Майже 471 тісяч людей в минувшім році нараховали музеї і ґалерії ПСК

Навщівность музеїв і ґалерій Пряшівского самосправного краю (ПСК) у 2025-ім році перевышыла вшыткы очекованя. Як інформовала Леа Леготьска із Одділіня комунікації ПСК, експозіції і дочасны выставы крайскых културных інштітуцій виділо майже 471 тісяч людей.

То є понад 31 тісяч людей веце як у 2024-ім році. Із того о выставы в музеяx проявило інтерес веце як 440 тісяч людей.

Лідером в навщівности в минувшім році знова быв Любовняньскый музей – град в Старій Любовні. Тот із понад 214 тісяч навщівниками покорив свій дотеперішній рекорд. Турісты годны были окрем традічных градных подій видіти і нову выставу під назвов Скарбниця Граду Любовня.

Музей модерного уменя Енді Варгола в Меджілабірцях презентовав унікатны умелецькы діла і артефакты із причіны комплексной реконштрукції мімо властных просторів на вынятково успішных выставах, котры одбыли ся у Франції, Чеській републіці і Польщі. Выставы пририхтованы Варголовым музейом виділо понад 67 тісяч людей.

Припоминаме, же новозреконштруованый музей буде в Меджілабірцях одкрытый тот рік і рахує ся із тым, же стане далшым рекордером у навщівности културный інштітуцій, котрых зряджовательом є пряшівска жупа.

Шарішскый музей в Бардейові, котрый має і сканден в Бардейовскых купелях, а в його експозіціях суть і русиньскы артефакты ці будовы народной архітектуры, навщівило понад 45 тісяч людей. Высшу навщівность музей заевідовав вдяка успішным выставам, а то і наперек тому, же в сканзені проходить велика реконштрукція.

Майже 33 тісяч навщівників мав у 2025-ім році і Вігорлатьскый музей в Гуменнім, котрый так само має і сканзен, де суть будовы народной архітектуры із русиньскых сел.

Шумны чісла мали і Підтатраньскый музей в Попраді, Музей в Кежмарку, Крайска ґалерія в Пряшові ці Підтатраньска ґалерія в Попраді. Крайскый музей в Пряшові, котрый має свої орґанізачны одділіня в Пряшові, Ганушівцях над Топльов і Стропкові, мав у минувшім році понад 12 тісяч навщівників.

Фото: Ян Салонь.