Обзерач Природы #97 – Нарвяньскій Нацийональный Парк

Нарев то єдна з найдолшых рік в Польщы. Плыне она закутинами Підляша, жебы під Варшавом вкінци получыти ся з Віслом. Верхнє течыня рікы єст особливо красне і зато тіж находит ся в границях нацийонального парку, котрый будеме експлорувати в найблизшым Обзерачу Природы.

Нарвяньскій Нацийональный Парк был основаный близко 30 років тому і дотепер єст він барз цікавом природничом атракцийом. Вшытко з причыны того, же аж 98% обшыри парку занимат сама ріка, багнисты грунты і терены часто підтоплюваны. Не найдеме там вельо інфраструктуры для туристів і може зато тот парк цілый час явит ся як дика остоя природы.

На вандрівку деревяныма лавками над ріком та на сплыв каяком по ріці Нарев красні прошу в найблизшу пятницю 13. лютого/фебруара о 13.00 год. Проґрам буде повтаряный в суботу 14. лютого/фебруара о год. 7.30 та в середу 18. лютого/фебруара о год. 4.30.

До стрічы на (радийовым) шляку!

джерело знимкы: Якуб Зиґмунт та Шымон Станєц (Wikimedia Commons, CC BY 4.0)