«Голосы Русинів Підкарпатя» – середа, 18.10 год.

Маляря Віталія Дороша добре знають нелем у Сваляві і їй окрузі, но і на цілім Підкарпатю. Не позераючі ся на доста молодый вік наш герой зробив много як умелець, педаґоґ, керовник, патріот свойой землі.

Іщі на самім початку трудовой діятельности Віталій выбрав кредо: «Прославляй Сваляву через умілство». Зато ідучі до свого ціля наш гость давно перекрочів рамкы вже сталых малярськых стілів і напрямів. На днесь його оберегы, мотанкы, іконы познаны всядыль. І дякуючі тому добив ся, же за родну му Сваляву чули у 35 державах світа.

Теперь Віталій – директор Свалявской школы умень, знамый педаґоґ, голова умелецького общества «Арт-Свалява», признаный на Підкарпатю і на Україні майстер пензлика.  Віталій Дорош твердить: «Коли челядник малює – ун ся лічить!»

Слухайте «Голосы Русинів Підкарпатя» в середу 4-го фебруара 2026 р. о 18.10 год., або повторіня в четверь 5-го фебруара о 4.30 год. і в суботу 7-го фебруара о 11.00 год. за русиньскым часом.