Філм Потопа має девять номінацій в словацькій народній філмовій премії

5-го фебруара 2026-го року Словацька філмова і телевізна академія публіковала номінації на народны філмовы премії Slnko v sieti (Сонце в сіті) за 2025-ый рік.

Потішуючім фактом є, же меджі номінованыма є і першый по русиньскы граный філм Потопа, котрый є в кінах од децембра минувшого року. Потопа здобыла довєдна аж девять номінацій в різных катеґорія філмовой премії.

38 приголошеных авдіовізуалных творів

Як Словацька філмова і телевізна академія інформовала у своїй пресовій справі, за 2025-ый рік приголошеных было 38 авдіовізуалных творів.

Із того до катеґорії Найліпшый граный філм было приголошеных 15 філмів, до катеґорії Найліпшый документарный філм 6 творів, до катеґорії Найліпшый анімованый філм 4 філмы, а до катеґорії Найліпшый телевізный філм (мінісерія) было приголошеных 7 телевізных творів.

Новотов од минувшого року была катеґорія Найліпшый короткометражный граный або документарный філм, до котрой тот рік приголошеных было 6 творів.

Потопа має девять номінацій

Найуспішнішым граным філмом за минулый рік, што до номінацій, є філм Непела, котрый захоплює часть жывота чехословацького медайлісты із Зимных олімпійскых гер в Саппорі із 1972-го року – словацького красокорчуляря Ондрея Непелы.

Но успішным в номінаціях є і філм Потопа, што ясно говорить о тім, же філм є позітівно приятый нелем русиньсков публіков, но заінтересовав і філмову крітіку а Словацьку філмову і телевізну академію.

В катеґофії Найліпшый граный філм є за філм Потопа номінованый режісер Мартін Ґонда і продуценты Катарина Кырначова, Томаш Ґіч а Віктор Шварц. В катеґорії Найліпша філмова режія має за Потопу номінацію Мартін Ґонда.

В катеґорії Найліпшый філмовый сценарь мають номінацію сценарісты Потопы Домініка Удворкова, Мартін Ґонда і Мартін Шустер. Катеґорія Найліпшый філмовый звук принесла за Потопу номінацію про Богуміла Мартінака, Івана Дюркеха, Квентіна Коллетта і Рено Ґійомена.

Юрай Кухарек здобыв номінацію в катеґорії Найліпша сценоґрафія. Татяна Фіґурова є номінована в катеґорії Найліпшы костімы. В катеґорії Найліпшы візуалны ефекты номінованы были за Потопу Тібор Меліш і Томаш Сровнал.

Номінованы суть і акторы. Сара Хрипакова має номінацію в катеґорії Найліпшый женьскый акторьскый выкон в головній ролі. Володимір Чема здобыв номінацію в катеґорії Найліпшый мужскый акторьскый выкон в другорядій ролі.

В каждій катеґорії Словацька філмова і телевізна академія публіковала по три номінації, із котрых выйде вітяз. В пресовій справі не была інформація, де і коли одбуде ся святочне передаваня премій Slnko v sieti за 2025-ый рік.