Културны орґанізації ПСК планують іти до проєктів із партнерами на україньскім боці

До трьох черезгранічных проєктів у области културы і турістічного руху в рамках меджінародной співпраці проґраму Interreg Next планує вступити Пряшівскый самосправный край (ПСК).

Як інформовала аґентура TASR, крайскы посланці на своїм засіданю в понедільок 9-го фебруара 2026-го року схвалили залучіня трьох културных орґанізацій під ПСК до проєктів із партнерами на україньскім боці. Іде о проєкты, котры дотуляють ся граду в Старій Любовні, Крайской ґалерії в Пряшові, і Вігорлатьской звіздарні в Гуменнім.

Што до Любовняньского музея – граду в Старій Любовні, цільом проєкту є обнова і модернізація веце частей ареалу, як і новы формы презентації културной дідовизны.

„Підпориме реконштрукцію адміністратівной будовы, соколярьского двора, суть планованы і рештавраторьскы роботы в каплічці, котра є на граді. Актівности із україньского боку мусять быти заміряны і на здравотны бенефіты. Будуть то шпеціалны културны актівности, котры мають регабілітачный характер, і уможнюють людям провести час в културнім оточіню,“ повіла ведуча Одділіня европскых штруктуралных і інвестічных фондів Уряду ПСК Драгоміра Ґмітрова. Очекованый розрахунок проєкту є 620 000 евр.

Крайска ґалерія в Пряшові планує робити проєкт із Закарпатьскым областным художным музейом імени Йосифа Бокшая в Ужгороді. Подля Ґмітровой хотять в Пряшові вдяка проєкту забезпечіти реконштруцкію єдного із двох міщаньскых домів, а так само выбудовати черезгранічну културну платформу із партнером. В рамках проєкту має зробити ся і технічне довыбавліня просторів ці реалізація културных і едукачных подій. Ґалерія рахує із розрахунком 750 000 евр на проєкт.

Проєкт Вігорлатьской звіздарні в Гуменнім дотулять ся моніторінґу світлового забруджіня в Карпатах і розвитку астротурістікы у співпраці із партнером на україньскім боці.

„Хочеме забезпечіти, жебы купити шпеціалный телескоп, і вєдно із партнером на україньскім боці реалізовати моніторінґ і оцінку світлового забруджіня,“ повіла Ґмітрова. На проєкт розрахунок встановленый є на суму 1,1 міліона евр. Але точна сума буде ясна аж по фіналізації проєкту.Реалізація споминаных проєктів културных орґанізацій, котры належать під ПСК, є напланована по схваліню жадостей о дотацію.