«Голосы Русинів Підкарпатя» – середа, 18.10 год.

Выступліня женьского вокалного аматерьского ансамбля «Руменок» чув єм першый раз на фестівалі «Червена ружа», котрый організовала Народна рада Русинів Закарпатя в Ужгородьскім ляльковім театрі у 2021-ім році.

То ня фест заінтересовало, зато зачав єм глядати інформацію о колектіві. І нашов немного: «Руменок» –  співацькый ансамбель, основаный у 2013-ім році, у 2018-ім році дістав званя «Народный». В репертоарі колектіву є понад 300 співанок, і векшына з них – русиньскы.

По «Червеній ружі» за куртый час звязала ся зо мнов, як співорґанізатором шорового русиньского фестівалу «Наохтема у рокаши», котрый ся плановав у Мукачовскім замку на Першу Сяту Марю (28-го авґуста) 2021-го року,  ведуча «Руменка» Олга Бобак з просьбов дати можность їх колектіву там выступити.

Подія была успішна, а на ній єм з Олгов і їй колектівом поцімборовав ся.

Слухайте «Голосы Русинів Підкарпатя» в середу 11-го фебруара 2026 р. о 18.10 год., або повторіня в четверь 12-го фебруара о 4.30 год. і в суботу 14-го фебруара о 11.00 год. за русиньскым часом.