«Слово» – Неділя мясопустна – неділя, 9.00 год.

Опередна Неділя блудного сына нам указала на три поставы – двох братів, з котрых єден одышов з дому отця, но потім пришов на то, же найліпше йому было в домі отця, і отця, котрый є милосердный і люблячій, котрый принимать свого сына назад.

Указує нам то прягнутя чоловіка по фалшывій слободі, но і прягнутя вернути ся назад, і приготовленость Бога у своїм милосердю прияти каючого ся грішника.

Днешна неділя нам уакзує, же тот час милосердя мать свої граніці. Же прийде момент, коли Господь прийде у своїй славі зо вшыткыма ангелами, засяде на престол свойой славы, і зыйдуть ся перед нього вшыткы народы. Як зазвучіть Божа труба архангела, вшыткы, котры через смерть были выданы розпадности, знова воскреснуть. І увидять в тілі свого Сотворителя, котрый прийде оддати каждому подля його діл.

Настане велике розділіня. То, што одбывать ся уж ту на землі. Де чоловік мать можности слободной волі і выберати собі сторону за Бога або проти Бога. Там уж не буде слободной волі. Але ангелы розділять на Божый наказ каждого. Будь на місце выбраных, або на місце проклятых. Третя можность не буде.

І повість Царь своїм выбраным на правій сторні. Оберне ся ку ним з любвов, його тварь буде жарити як сонце, з його уст будуть выходити з великов любвов радостны слова: Подьте благословлены, мої выбраны, мої любы, до царьства вічного, вам приготовленого од сотворіня світа. Подьте ся насолоджовати радостьов вічнов. Без страху з болести, терпіня, хворот ці смерти. Тото уж ся вас не дотулить. Уж не буде ниякого зла. Будете жыти в радости. В любви на цілу вічность.

А Ісус подавать крітерії суду: Любов і милосердя ку ближнім. Бо я быв голоден, затлітый, нагый, а вы сьте мі послужыли. Тогды справедливы з великым зачудованьом і радостьов одповідять: Господи, а де же сьме тобі послужыли. Мы тя не виділи. А Він їм з великов любвов одповість: Мої любы, што вы зробили єдному з найменшых. Єдному зо своїх ближніх. Тадь то я быв в образі голодного, затлітого, вы сьте послужыли мі.

Но тыж ся оберне і ку тым на лівій стороні, котры будуть стояти перед ним у великім страху і ганьбі. Його тварь ся змінить, і строго їм повість: Ідьте од мене, прокляты, до вічного огня, котрый приготовленый є про діавола і його ангелів.

Ісус буде высловльовати тоты слова з великов болестьов: Тадь про вас єм пришов на землю, перешов єм вшыткым, вылляв до послідньой капкы свою кров. Приготовив єм про вас небо. А вы сьте тото одвергли, сміяли сьте ся з моїх слов. Не брали важно мої напомянутя.

То я єм приходив ку вам в подобі бідных, терплячіх, просив фалаточок хліба, погар воды, шаты на прикрытя наготы, притулок од зимы, жебы дати царьство вічне. Вы сьте ня одганяли, погорджовали. Вы сьте сі выбрали свойого отця діавола, мене сьте одвергли, теперь будете з ним перебывати в муках навікы. А Євангеліє закончує: І підуть тоты на вічны мукы, а справедливы до вічного жывота.

Дорогы радіослухачі, тоты слова звучать може про нас страшно, но Ісус їх подавать нам днесь з любвов. Бо оперед говорить тоты слова ку проклятым, жебы їх не мусив над нами высловити тогды. Бо теперь іщі є про нас тот час. Кедь сьме на місці тых на правій стороні, вытримайме. А коли днесь чуєме, же бы сьме ся нашли на місці проклятых, іщі є час.

Ту можеме легко перейти з лівой на праву сторону через покаяня, через любов і милосердя ку ближнім. Там ся то уж не дасть. Слава Ісусу Хрісту!

В неділю, 15. фебруара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. фебруара 2025 р. о 12.00 год. і 16. фебруара 2026 р. о 2.00 год. за русиньскым часом.