«Голосы Русинів Підкарпатя» – середа, 18.10 год.

Із честьов одношу ся до вшыткых етносів і віросповідань. Але сам єм Карпаторусином і православным хрістіаном. Зато хочу жыти видячі честь довкола себе і оддаючі єй – честь, так само вшыткым, з кым комунікую.

Радує ня, же Православна церьков на Підкарпатю має праздник – Собор карпаторуськых святых, котрый святкує ся першу неділю по Дні памяти святых рівноапостольскых братів Кіріла і Мефтодія, творців славяньской писемности.

Такых святых є пятьнадцять. Хоць на іконі з єднаков назвов «Собор карпаторуськых святых», котру іщі называють «Нанковска» (зверьху на іконі зображена є Нанковска Божа Мати) є лем 14 святых. То Кіріл і Мефтодій, апостолам рівный Ростислав – князь Великоморавскый, преподобный Йоан Чеськый, преподобный Мойсей Угрин, преподобный Єфрем Угрин, мученик Ґеорґій Угрин, святитель Иосиф Мараморошскый, святитель Досифей Угольскый і Карпаторуськый (Феодоровіч), праведник і ісповідник Алексій (Товт) Карпаторуськый, мученик Максим (Сандовіч) Ґорлицькый, святитель Досифей Нішскый і Карпаторуськый (Васич), преподобный Алексій (Кабалюк) Карпаторуськый, і преподобный Йов Угольскый.

Іщі єден русиньскый святый – преподобный Юстін Челійскый (Попович) на іконі не є зображеный.

Окрем того на дакотрых іконах «Собор карпаторуськых святых» суть образы лем дванадцятьох святых.

Зато сьме ся і звернули за поясніньом того до гостя «Голосів Русинів Підкарпатя» – дяка Свято-Ілліньского православного храму села Німецька Кучава Славка Когутича. Якраз з ініціатівы Славка на іконостасі їх церькви были зображены образы дванадцятьох карпаторуськых святых.

Слухайте «Голосы Русинів Підкарпатя» в середу 25-го фебруара 2026 р. о 18.10 год., або повторіня в четверь 26-го фебруара о 4.30 год. і в суботу 28-го фебруара о 11.00 год. за русиньскым часом.