Сумар дня на 27. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 27. лютого/фебруара 2026 р.

ПАП буде на выключніст презентувала фотоґрафіі Станіслава Криціньского

Польска Пресова Аґенция буде на выключніст презентувала збіркы фотоґрафій Станіслава Криціньского. В роках 70., 80. і 90. Криціньскій фотоґрафувал предовшыткым порожні і знищены лемківскы села, церкви і заникаючы сліды культуры Лемків. Його фотоґрафіі сут документом о народі, што был примусово выгнаный зо своіх хыж. Криціньскому повело ся утырвалити на знимках остаткы по лемківскых селах, по якых днес неє уж бодай сліду. Фотоґрафічный архів Польской Пресовой Аґенциі буде репрезентувал на выключніст збіркы Станіслава Криціньского, на якы складат ся парунадцет тисячів знимок. Як подала шефова Ансамблю Архіву Foto PAP Катажына Лібрехт, «(…) То важна збірка, котра становит сутьове свідоцтво істнуваня і достоменности Лемків. Завдякы переданю фотоґрафій до архіву будут они мочы быти шырше удоступняны і выкорыстуваны, трафляючы до чысленной публикы». Процес описуваня і додаваня до базы зачне ся на початку марця. Фотоґрафіі будут систематично додаваны на сайті fotobaza.pap.pl.

Выстава народного облечыня і вытварной штукы нацийональных комуніт Войводины

В минулу середу 25. лютого/фебруара в Інституті про культуру войводиньскых Словаків была одкрыта выстава народного облечыня і вытварной штукы нацийональных комуніт Войводины. Інформувала о тым аґентура Рутенпрес. Выстава є частю медженародного проєкту Interreg IPA Мадяры – Сербія пн. Границя, котра нас лучыт, при котрым вєдно спілпрацували од 2024 р. інституты про культуру войводиньскых Мадярів, Русинів, Хорватів, Словаків і Румунів. Як подало Рутенпрес, в рамках того вецерічного проєкту, якій завершат ся як раз том выставом, представлены были культурны цінности реґіону, а так само укріпила ся спілпраца медже нацийональныма меншынами в Войводині. Русины на выставі презентуют святочне і робоче жіноче облечыня. Кроі представил Саша Сабадош, директор Інституту про культуру войводиньскых Русинів. Русины выставлюют тіж образы Владиміра Дороґзахія. Выставу мож видіти в Новым Саді до кінця марця того рока. Дрібниці чытайте в дописі на нашым портали.

Дальшы подіі товаришучы выставі «Формы присутности. Штука Лемків/Карпатскых Русинів»

Ближат ся дальшы подіі товаришучы выставі «Формы присутности. Штука Лемків/Карпатскых Русинів», презентуваній в Державным Етноґрафічным Музею в Варшаві. На заран музей наплянувал чергове опроваджаня пн. «Іконы Лемковины», якє поведе Аґнєшка Клещ. Позаране, в неділю 1. марця пройдут фамелийны керамічны варштаты, на котрых творці заінспіруют ся гірскыма краєвидами. В неділю 8. марця одбуде ся опроваджаня з темом «Хыжа як простір памяти». Поведе го куратор выставы др Михал Шымко. В тот сам ден будут тіж проходити фамелийны варшататы з циклю «На лемківскым пути». Тым разом участникы зрыхтуют гірскы краєвиды техніком коляжу. В суботу 14. марця одбуде ся дальше тематичне опроваджаня по выставі з темом «Портрет Лемкыні», якє поведе Аґнєшка Клещ. В тот сам ден пройде тіж стріча з Доротом Нєзнальском, котрой інсталяция єст презентувана на експозициі. В середу 18. марця одбуде ся тихе звиджаня выставы, по стандардовых годинах отвертя музею. В суботу 21. марця одбудут ся варштаты творіня лемківской кривулькы. А в віторок 24. марця пройде опроваджаня з темом «Памят: молчачы предметы, жывы істориі». Поведе го куратор выставы Михал Шымко. Дрібниці о вшыткых подіях находят ся на інтернетовым сайті Етноґрафічнного Музею в Варшаві.