«Слово» – 1-ша неділя Великого посту – неділя, 9.00 год.

З Божой благодати сьме пережыли першый тыждень святого Посту. Якый быв тот тыждень, быв про нас хосенный? Прияли сьме позваня нашого Господа до того благодатного часу, або сьме одіґноровали, і тот дорогоцінный час прогайновали. На кінцю того тыждня є добрі собі дати серьйозну одповідь.

Днешня неділя, котра ся называть і Недільов Ортодоксії, нам говорить о побіді. Побіді, котра была дарована Церькви над іконоборством. То є намаганьом ся зневажовати або бойовати проти оддаваня чести святым іконам. Хоць тот час приніс много жертв тых, котры за святы іконы пролляли і свою кров, предсі побіда Церькви была дарована.

Подобно і вчера, на Першу суботу святого Посту сі припоминаме побіду над таємныма задумами злобы. Коли імператор Юліан, котрый одступив од Хріста і цілу енерґію вложыв до того, жебы пронаслідовав хрістіанів, хотів зневажыти і высміяти хрістіаньскый піст. Дати наказ в таємности покропити їдла на торгу з кровльов з пожертвованя ідолами. Так хотів высміяти і самого Хріста, котрый, як думав, не міг його сперти. Но вышло цалком іншак.

Господь видить таємности людьского сердця. Посылать святого мученика Теодора Тирона, котрый ся появив архієпіскопови цариградьскому і наказав, жебы хрістіаны нич не куповали на торгу. Но намісто того їли коливо – варену пшеніцю з медом. Так быв план і задум Юліана выявленый, і він быв заганьбленый.

Тоты побіды нам указують, же хто щіро іде по Божій дорозі, Господь му є помічником в різных напастях, котры діавол наставив.

Днешнє слово Євангелія нам говорить о покликаню Філіпа, котрого Ісус нашов і повів: Подь за мнов. Він такой радостно приймать тото запрошіня і утікать ся поділити з тов радостьов зо своїм приятельом Натанаїлом. Йому звістує: Мы нашли того, котрого пророкы проповідали, Ісуса з Назарета. Но Натанаїл холодоно приймать тоты слова, як з Назарета? Він не знав, же Ісус ся народив у Віфлеємі согласно з пророцтвами. Но Філіп йому говорить: Подь і посмоть. А Коли ішов ку Ісусови, Ісус його видів здалека і повів: То правдивый Ізраільтян, в котрім не є фалшывости.

Дороргы радіослухачі, Господь кличе і нас: Подь за мнов, кличе нас до далшого тыждня того святого часу, жебы перебывати з Ним. В молитві, пості, стрічати го в ближніх просячі милостыню.

Выхоснуйме тот святый час, най і о нас платять тоты слова адресованы Натанаїлови: То є правдивый хрістіан, котрый справды іде за мнов, в котрім не є фалшывости ани ку людям, ани ку Богу. Слава Ісусу Хрісту!

В неділю, 1. марца 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 1. марца 2026 р. о 12.00 год. і 2. марца 2026 р. о 2.00 год. за русиньскым часом.