Сумар дня на 6. марця 2026 р.

Приносиме вам сумар медияльной ґрупы ЛЕМ.фм+ на ден 6. марця 2026 р.

XCI засіданя Спільной Комісиі Уряду та Нацийональных і Етнічных Меншын

В віторок 24 марця в головній сідибі Міністерства Внутрішніх Справ і Адміністрациі в Варшаві одбуде ся 91. засіданя Спільной Комісиі Уряду та Нацийональных і Етнічных Меншын. В порядку засіданя заплянуване єст м.ін. омовліня інформациі міністра властивого до справ нацийональных і етнічных меншын о поділі дотаций на реализацию в 2026 р. задач маючых на ціли охорону, захованя і розвиток культурной достоменности нацийональных і етнічных меншын та захованя і розвиток реґіонального языка. Дальше буде выступліня представника Міністерства Наукы і Высшого Шкільництва в Спільній Комісиі пн. «Проблематика нацийональных і етнічных меншын та спільноты хоснуючой реґіональный язык з перспективы Міністерства Наукы і Высшого Шкільництва”. Окрем інчого порядок передвидує і омовліня становиска урядовой стороны ґу внескам меншыновой стороны Комісиі о зміну Карного Кодексу і Кодексу Карного Поступуваня.

ХІV едиция Медженародной Літньой Школы Русиньского Языка і Культуры

Інститут Русиньского Языка і Культуры Пряшівского Університету оголосил набір на 14. едицию Медженародной Літньой Школы Русиньского Языка і Культуры Studium Carpatho-Ruthenorum 2026. В тым році літня школа буде проходила в днях од 7. do 27. червця/юнія. Studium Carpatho-Ruthenorum то шторічный едукацийный проґрам заміряный на вчыня русиньского языка, істориі, літературы, культуры і етноґрафіі карпатскых Русинів. Лекциі ведены сут в русиньскым і анґлицкым языках і берут в них участ ученикы з ріжных держав. Інститут Русиньского Языка і Культуры Пряшівского Університету реализує проґрам од 2009 рока. Є то єдина того типу школа на світі. Участ в ній мож взяти без огляду на вік, походжыня ци дотеперішню освіту. Проґрам обнимат парудесят клясичных лекцийных годин, але тіж цілый шор додатковых атракций, як презентациі фольклору, прогулькы, театральны і фільмовы вечеры, варштаты і інтеґрацийны стрічы. Ціна курсу обнимат 3-тыжньову школу, закватеруваня і ідло та вшыткы білеты вступу і інчы оплаты. Аплікувати до проґраму мож до 1. квітня/апріля тр.

Подіі товаришучы выставі «Формы присутности. Штука Лемків/Карпатскых Русинів»

В найблизшых днях в Державным Етноґрафічным Музею в Варшаві пройдут дальшы подіі товаришучы выставі «Формы присутности. Штука Лемків/Карпатскых Русинів». Уж в неділю 8. марця одбуде ся кураторскє опроваджаня з темом «Хыжа як простір памяти». Поведе го куратор выставы др Михал Шымко. В тот сам ден будут тіж проходити фамелийны варшататы з циклю «На лемківскым пути». Тым разом участникы зрыхтуют гірскы краєвиды техніком коляжу. В суботу 14. марця одбуде ся дальше тематичне опроваджаня по выставі з темом «Портрет Лемкыні», якє поведе Аґнєшка Клещ. В тот сам ден пройде тіж стріча з Доротом Нєзнальском, котрой інсталяция єст презентувана на експозициі. В середу 18. марця одбуде ся тихе звиджаня выставы, по стандардовых годинах отвертя музею. В суботу 21. марця одбудут ся варштаты творіня лемківской кривулькы. А в віторок 24. марця пройде кураторскє опроваджаня з темом «Памят: молчачы предметы, жывы істориі». Дрібниці найдете на сайті Державного Етноґрафічного Музею в Варшаві.