Сумар дня на 9. марця 2026 р.

Приносиме вам сумар медияльной ґрупы ЛЕМ.фм+ на ден 9. марця 2026 р.

Братислава має нового грекокатолицкого єпарху

В пятницю 6. марца тр. папа римскій Лев XIV приял зречыня ся уряду братиславского єпархы – Преосвященого владыкы Петра Руснака. Єдночасно призначыл новым єпархом дотеперішнього помічного братиславского єпископа – кыр Міляна Лаха. Кыр Петро досягнул канонічный вік 75 років в вересни/септембрі минулого рока, і подля церковного права має єпископ при тій нагоді подати резиґнацию Вселеньскому Архієрейови, котрый єй не мусит приняти такой. Владыка Мілян стал історично другым братиславскым єпархом. Інтронізация нового єпархы одбуде в суботу 21. марця тр., в братиславскым Крестовоздвиженьскым Соборі. Владыка Мілян має русиньскє походжыня і не раз ся ґу своім коріням приголосил. Підпорил і русиньску кампанію перед списуваньом жытелів в 2021 році на Словациі. Більше чытайте в дописі на нашым портали.

Пряшівскій Самосправный Край жадат окремый проєкт Interreg з Украіном

Словация веде в Бруксели переговоры о створіню окремого проєкту Interreg з Украіном, котрый бы поміг в розвитку східньой части державы. Інформувал о тым председа Пряшівского Самосправного Краю Мілян Маєрскій, в рамках Пленарного засіданя Европейского комітету реґіонів в Брусели, котрый проходил 4. і 5. марця. Жупан уточнил, же про Пряшівскій Край, котрый о такій окремый проєкт пожадал, є ключове, же новы рамкы підпоры приграничных реґіонів, котры представила Европейска Комісия, односят ся і до реґіонів, што сусідуют з Украіном, значыт на реґіоны східньой Словациі. Веце на тоту тему прочытате в дописі на нашым портали.

Великодні Торгы в Державным Етноґрафічным Музею в Варшаві 

Державный Етноґрафічный Музей в Варшаві просит на Великодні Торгы. Подія одбуде ся в неділю 22. марця в год. од 10.00 до 16.00 в просторах Музею. Як подає інституцуя, марцьова подія то нагода видіти і купити унікатны, ручні зроблены предметы, м.ін. великодні прикрасы, писанкы, пальмы і вшелеякы артистичны творы. Великодні Торгы в Державным Етноґрафічным Музею в Варшаві были першом і вельо років єдином того рода подійом в столици. З часом стали ся важным пунктом на культурній мапі Варшавы, постійні вписаным в передсвяточный час. На подіі запрезентуют ся заєдно народны творці, одкликуючы ся до традицийного і реґіонального ремесла, як і особы інспіруючы ся естетиком сучасного дізайну. В рамках Торгів пройдут і товаришучы подіі. Будут варштаты ремесла, концерт, родинны анімациі. Для діти заплянуваны сут варштаты в едукацийным просторі посвяченым Лемкам. О дрібницях Музей буде інформувал неодолга. Вступне на подію в рамках білету вступу на вшыткы выставы. Мож го придбати в касах або на сайті Музею.

Лемківско-погіряньскій великодній ярмак в Лоси

Традицийно, великодній ярмак буде і в Лоси. Лемківско-погіряньскій великодній ярмак одбуде ся в неділю 22. марця в Мазярскій Загороді в Лоси. Подія зачне ся о 11.00 год. Окрем кєрмешу ремесла і можливости скоштуваня реґіональной кухні од Кружка Сельскых Ґаздынь в Лоси в проґрамі передвиджено другы атракциі. Будут то м.ін. варштаты писанок, струганых яєц, малюваных лжыц, пальм, прикрас з сіна і соломы і дальшых. Окрем того будут великодні забавы: турнір битя яєц, метаня яйцьом через стодолу, а для діти полюваня на яйця. Пак в церкви в Лоси даст концерт вокально-інструментальный ансамбль Фенікс з Основной Школы в Лоси. Вступне 2 злоты.