Сумар дня на 11. марця 2026 р.

Приносиме вам сумар медияльной ґрупы ЛЕМ.фм+ на ден 10. марця 2026 р.

Вмер Славомир Канюк – дяк, хориста,  любитель Лемковины

З жальом інформуєме, што 9. марця, на 53 році жытя, вмер Славомир Канюк – дяк, хориста лемківскых ансамблів, одданый парохіянин Парохіі Покровы Пресвятой Богородиці в Ганчовій. Славомир Канюк вродил ся в 1973 році в Креници в родині Йоана і Наталиі Канюків. Абсольвувал студиі на Християньскій Теолоґічній Академіі в Варшаві. Брал активну участ в літургічным жытю Церкви на Лемковині. Послугувал як дяк в парохіях в Ганчовій і Высовій. Был заанґажуваным парохіянином, опроваджал по церкви в Ганчовій. Од все співал. Долгы рокы был членом Молодіжного Хору Православной Перемышльско-Новосандецкой Єпархіі «Ірмос» та Мужского Камерального Хору «Клірос». Анґажувал ся тіж в соспільне жытя лемківской спільноты. Будучы членом креницкой православной парохіі, брал участ в театрально-музичных видовисках, якы рыхтувал Петро Мурянка-Трохановскій. Представліня тыкали історичных тем звязаных зо спадковином Лемків, вказуваны были при нагоді пропамятных стріч і церковных торжеств. Свій талант до співаня (был тенором) розвивал тіж в світскым хорі «Зоря» з Устя Руского. Был глубоко звязаный з Лемковином. Осиротил троє діти. Вічная памят.

Ци бывате в Горах? Што до зміны? Просиме выполнити анкєту

Припоминаме, што наше стоваришыня, Стоваришыня «Руска Бурса» в Ґорлицях, просит до участи в анкєтовым баданю про Вашы одвидины в Горах. Хоц анкєта напрявлена є предовшыткым на туристів, то каждый може єй выполнити. Звіданя тыкают м.ін. Вашой оціны нічліговой базы в Низкым Бескіді, ґастрономічной оферты, трас прогульок, атракций реґіону, окрисліня того, што Вас найбарже притігат в тоты страны. Звіданя сут головні заперты. Выполніня занимат около 5 минут. Анкєта єст тіж доступна в лемківскоязычній версиі. Мотузок до анкєты находит ся гев: www.webankieta.pl/ankieta/. Заохочаме вшыткых до єй выполніня.

Апель служб, жебы не выпаляти трав

Уж четвертый раз в Коменді Повітовой Поліциі в Ґорлицях зобрали ся представникы служб і інституций ґорлицкого повіту, котры одповідают за безпеку громадян, жебы підписати апель до мешканців о невыпаляня травы. Вєдно з приходом весны росне пожарова загороза звязана з высыханьом ґрунту і сухой рослинности. Службы, котры одповідают за безпеку, припоминают, же выпаляня травы може довести до неконтролюваного пожару. Оген барз скоро розходит ся на сусідні обшыри – поля, ґаздівску забудову, а тіж лісы – а тото творит реальну загорозу для жытя і здоровля люди і звірят. В Польщы інстнує правный заказ выпаляня трав. За недотриманя горозит грошова кара, а в примірі спричыніня пожару – аж і 10 років взязниці. З консеквенциями мусят рахувати ся тіж ґаздове – выпаляня ґрунтів може быти причыном меншой доплаты або єй втраты. Службы апелюют о розвагу і одповідальніст.

Варштаты для діти

В найблизшым часі в Шкільно-Предшкільным Комплексі в Ґладышові одбудут ся варштаты для діти, котрых орґанізатором єст Стоваришыня «Руска Бурса» в Ґорлицях. Варштаты перезначены сут для діти, котры сут участниками занять з лемківского языка. Підчас першых, з цілого циклю варштатів, діти зроблят зіндивідуализуваны взоры на полотняных торбах. Кажду торбу буде сой мож взяти по варштатах. Орґанізатор забзепечат вшыткы материялы. Варштаты одбудут ся в четвер 19. марця. А в неділю 29. марця в сідибі Руской Бурсы в Ґорлицях одбудут ся одкрыты варштаты малюваня яєц. Початок о 15.00 год. Забезпечаме варены яйця, воск до малюваня і фарбы.