Сумар дня на 12. марця 2026 р.

Приносиме вам сумар медияльной ґрупы ЛЕМ.фм+ на ден 12. марця 2026 р.

В ясельскым повіті будут ремонты лемківскых церкви

В ясельскым повіті признано дотациі на консерваторскы працы при кількох забытковых святынях, в тым і при лемківскых церквах. Дофінансуваня отримат м.ін. памяткова деревяна церков в Котани (ґміна Кремпна), де проведена буде консервация елементів іконостасу. Вартіст робіт то понад 46 тис. злотых, з чого 30 тис. то дотация. Дотацию признано тіж на консервацию двох ікон в лемківскій церкви в Святковій Малiй (ґміна Кремпна). Працы сут продолжыньом попередніх консерваторскых робіт і мают на ціли охорону історичного выпосажыня святыні. Вартіст робіт выносит понад 130 тис. злотых, а дотация становит 55 тис. Підпору достане тіж православна церков св. Михаіла Архангела в Перегримці, де проведеный буде наступный етап заміны покрытя вежы (бабинця). Дотация на тоту інвестицию выносит 50 тис. злотых, а цілковитый кошт то понад 202 тис. злотых.

Русины на Мадярах будут выберати

Мадяры жыют передвыборчом кампанійом. 12. квітня/апріля одбудут ся рядны парляментарны выборы, котры вырішат о новым складі Парляменту Мадяр. Выборы сут слідуваны світовыма медиями. По 16 роках може Віктор Орбан і його партия Fidesz першый раз програти, і достати ся до опозициі. Мадярскы выборы не сут лем о політичных партиях. В змішаній системі выборів до Земского Сойму мают меншыны право выбрати собі свого депутата або говорцю. Выберати свого говорцю будут і Русины. До русиньской меншыны на Мадярах приголосило ся в 2022 р. 7111 осіб, і особы тоты будут выберати так як в попередніх періодах свого говорцю. Вшытко тіж вказує на тото, што Русины будут мати нового говорцю. Дотля на тій посаді є Віра Ґіріц, яка того рока уж не кандидує. Выборчый комітет Вседержавного Русиньского Самосправуваня про тоты выборы має вісем кандидатів. Лідером списку є Віктор Крамаренко, сучасный председа Вседержавного Русиньского Самосправуваня. За ним сут Віктор Ґіріц, Петер Гладинець, Віктор Дулишкович, Янош Кожняньскій, Ґабор Варґа, Евелін Скыба і Анастазия Тіводар.

Промоция «Контекстуального словника лемківского языка»

Припоминаме, што 20. марця на Ягайлоньскым Університеті одбуде ся стріча з проф. Оленом Дуць-Файфер і членами словникового ансамблю, в рамках котрой буде запрезентуваный «Контекстуальный словник лемківского языка». Стріча має быти нагодом до дискусиі при участи проф. Мацєя Рака і проф. Генрика Фонтаньского. Авторы словниковых госел будут оповідати о ідеі і працах над словником. В рамках проґраму промоциі публикациі одбуде ся выступ ансамблю Лада і музичного дуету Дариі Кузяк та Ольгы Стариньской. Вступне на подію дармо. Стріча одбуде ся в Collegium Maius. Початок о 15:00 год. На подію просят Ягайлоньскій Університет, Выдавництво Академіцка Книгарня, в рамках котрого словник ся вказал (з сериі Scripta Lemkoviana), і Музей Ягайлоньского Університету.

Дальшы подіі в рамках выставы «Формы присутности. Штука Лемків/Карпатскых Русинів»

В найблизшых днях в Державным Етноґрафічным Музею в Варшаві пройдут дальшы подіі товаришучы выставі «Формы присутности. Штука Лемків/Карпатскых Русинів». Позарани, 14. марця одбуде ся дальше тематичне опроваджаня по выставі з темом «Портрет Лемкыні», якє поведе Аґнєшка Клещ. В тот сам ден пройде тіж стріча з Доротом Нєзнальском, котрой інсталяция єст презентувана на експозициі. А в середу, 18. марця одбуде ся тихе звиджаня выставы, по стандардовых годинах отвертя музею. В суботу 21. марця одбудут ся варштаты творіня лемківской кривулькы. А в віторок 24. марця пройде кураторскє опроваджаня з темом «Памят: молчачы предметы, жывы істориі». Дрібниці найдете на сайті Державного Етноґрафічного Музею в Варшаві.