Владыка Маріян Андрій Пацак став візітатором про ґрекокатоликів у западній Европі

В пятніцю 13-го марца 2026-го року Святішый Престол інформовав, же Папа Римскый Лев XIV. призначів владыку Маріяна Андрія Пацака за апостольского візітатора про ґрекокатоликів із Словакії, котры жыють в западній Европі.

Преосвященый владыка Маріян перебрав службу візітатора по кір Міланови Лахови, якый быв призначный новым братіславскым єпархом.

Апостольскый візітатор є делеґатом Папы Римского, векшынов на посаді єпіскопа. Має уділены особливы, шырокы уповномочіня і одповідный є лем перед Вселеньскым Архієрейом. Окрім іншого выконує обоязкы єпіскопа в єпархії, де не є єпіскопа, або про віруючіх, якы не належать під даяку теріторіално выділену єпархію.

Владыка Маріян Андрій Пацак (1973 р.) є родаком із Левочі. Є членом Конґреґації Найсвятішого Ізбавителя (ретемпторіста). Вічны обіты склав у 1997-ім році. Теолоґічны штудії абсолвовав у Кракові, Тухові і Римі в роках 1991 аж 1998. На священика быв рукоположеный 12-го юла 1998-го року в Монастырі редемпторістів у Михалівцях.

На Латераньскій універзіті – Академії святого Алфонза в Римі, абсолвовав постґрадуалны штудії шпеціалізованы на моралну теолоґію.

5-го юла 2018-го року быв Святішым Отцьом Франціском призначеный за єпарху Єпархії свв. Кіріла і Мефтодія про Словаків візантійского обряду в Торонті. Єпіскопску хіротонію прияв 2-го септембра 2018-го року в Базиліці мінор Сошествія Святого Духа в Михалівцях. Головным святительом быв втогдышній пряшівскый архієпіскоп і митрополіта – владыка Йоан Бабяк, вєдно з ним сполусвятителями были втогдышній кошыцькый єпарха – владыка Мілан Хаутур, і втогдышній братіславскый єпарха – владыка Петро Руснак. Інтронізованый быв 15-го септембра 2018-го року в Катедралнім соборі Рождества Пресвятой Богородіці в Торонті.

20-го октобра 2020-го року Папа Римскый Франціск прияв жадость владыка Маріяна, котрый зрік ся уряду єпархіалного єпіскопа. Як емерітный єпіскоп жыє в Монастырі редемпторістів у Старій Любовні. Єпархія наслідно стала екзархатом, і тот быв підпорядкованый русиньскій Піттсбурзьскій митрополії.