Сумар дня на 13. марця 2026 р.

Приносиме вам сумар медияльной ґрупы ЛЕМ.фм+ на ден 13. марця 2026 р.

Желізничны переізды на Сандеччыні будут стеруваны автоматичні

Дакотры желізничны переізды на Сандеччыні будут стеруваны автоматичні, а не людми. PKP Польскы Желізничны Леніі змодернізуют 15 желізничных переіздів в Малопольщы, а 11 медже Тарновом і Креницьом. Буде то 8 скрижувань зо шлябанами на терені Мушыны, Жеґєстова, Старого Санча, Бобовой, Цєнжковиц і Ґромника та 3 переізды зо світлами в Бобовій, Цєнжковицях і Жеґєстові. Як подає Дорота Шаляха з пресового бюра PKL PLK, зміны мают поправити безпеку. Новы системы мали бы позволити скорше реаґувати на підізджаючы склады і ліпше забезпечыти дороговый рух. В ситуациі выступліня дефекту (usterki), систем автоматично інформує о тым факті дижутного руху, што уможливят одраз ввести ограничыня скорости потягів, закля доіхают до скрижуваня торів з дорогом. Дорота Шаляха запевнила, што зміны не влинут на рівен затрудніня в спілці PKP PKL.

Календар Подій Стоваришыня Лемків 2026 

Стоваришыня Лемків подало свій Календар Подій на 2026 р. В днях 23.-24. мая тр. одбуде ся 13. Бієнале Лемківской/Русиньской Культуры – Ruthenale. На подіі, яка проходит што два рокы, стірчают ся в Креници родакы з ріжных держав. Дальше, в днях 31. липця/юлия – 2. серня/авґуста буде проходила 46. Лемківска Ватра на Чужыні в Михалові. Пак, в днах 19.-20. вересня/септембра одбуде ся Лемківска Творча Осін. На жолтен/октобер Стоваришыня Лемків заплянувало Стрічы з Лемківском Культуром в Ґожові Великопольскым. Так само в жолтни/октобрі, в вікенд 24.-25., одбудут ся Стрічы Трьох Поколінь з Лемківском Культуром в Пшемкові і Любіні.

ХIV Русиньскій Фестіваль в Свиднику

Ближыт ся 14. річник Фестівалю Культуры Русиинів Словациі – Русиньскій Фестіваль, котрого головным орґанізатором є Окресна Орґанізация Русиньской Оброды в Свиднику. Подія проходит в Свиднику од 2013 р. Фестіваль тырват цілый тыжден і обнимат такы подіі як выставы творів штукы, показы фільмів, бесіды, як і выступы музичных, танцювальных і театральных ґруп. Од понеділька до четверга проходят ріжного рода товаришучы акциі. В пятницю зачнынат ся головна част фестівалю – в свидницкым амфітеатрі, і тырват до неділі. 14. Річник Русиньского Фестівалю в Свиднику пройде в днях 25-31 мая тр. Як дотля подали орґанаторы, в проґрамі на пятницю єст м.ін. 7. річник Фестівалю Орфеус – музичной переглядкы авторской русиньской творчости, выступы фолькльрного ансамблю Шаришан і дальшых. В суботу запрезентує ся м.ін. ПУЛьС з Пряшова – єдиный в світі професийный русиньскій ансамбль, фольклорна ґрупа Заруба з Няґова, Душан Янечек і Прасліца і дальшы. В недію буде мож видіти выступ Fabrici Folk Production – Dominik Fabrici, окрем того запрезенуют ся домашні ансамблі і гості. На сайті Фестівалю мож уж придбати 3-дньовы білеты вступу. На фейсбуковым сайті Русиньского Фестівалю фурт будут ся являти інформациі о дальшых подіях і ансамблях, што выступлят в амфітеатрі. Полный проґрам буде опубликуваный в місяци подіі.