Сумар дня на 16. марця 2026 р.

Приносиме вам сумар медияльной ґрупы ЛЕМ.фм+ на ден 16. марця 2026 р.

Святый Собор Єпископів ПАПЦ рішал о торжествах з нагоды 100. річниці повороту Лемків до православія

Святый Собор Єпископів Польской Автокефальной Православной Церкви рішал о центральных святкуванях з нагоды 100. річниці повороту Лемків до православія. Центральны молитовно-благодарны торжества одбудут ся в Ґорлицях, в неділю 6. вересня/септембра, т.є. в ден памяти св. священномученика Максима Ґорлицкого. З той нагоды Собор встановил тіж Ювілейный Медаль. Владыкы рішали о тым підчас послідньой сесиі Собору, што проходила в віторок 10. марця і тыкала актуальных зовнішніх і внутрішніх справ жытя Церкви. Окрем того признаны были пасхальны нагороды для духовенства, та вызначены будучы загальномитрополитарны колекты. М.ін. на марец 2027 р. вызначена была колекта на ремонт церкви свв. Космы і Даміяна в Бліхнарці, а на квітен/апріль 2027 р. на реализацию розпису в церкви св. Владиміра в Креници.

Владыка Мариян Андри Пацак призначеный за апостольского візитатора про грекокатоликів зо Словациі

В пятницю 13. марця Святішый Престол інформувал, же Папа Римскый Лев XIV призначыл владыку Марияна Андрия Пацака за апостольского візитатора про грекокатоликів зо Словациі, котры жыют в західній Европі. Апостольскій візитатор є делеґатом Папы Римского, векшыном на посаді єпископа. Має уділены особливы, шырокы уповномічніня і одповідальный є лем перед Вселеньскым Архієрейом. Окрем інчого выконує обоязкы єпископа в єпархіі, де неє єпископа, або про вірных, якы не належат під даяку територияльно выділену єпархію. Веце прочытате в дописі на нашым портали.

В новым часописі Linguapax Review мож чытати і о лемківскым языку

Вказал ся 13. річник часопису Linguapax Review, печатаный безпрофітовом орґанізацийом Lingupax International, што діє для охороны і промуваня ґлобальной языковой ріжнорідности, підтримуючы меджекультуровый діалоґ і мир. Новый номер посвяченый єст меджепоколіньовому переказови як ключовому елементови тырвалости меншыновых языків. Анализуваны припадкы вказуют, же інституцийональне вызнаня ци шкільна едукация, хоц фундаментальны, не сут старчаючы, жебы заґарантувати перетырваня языка, як не єст він хоснуваный в родині і штоденным жытю. Получыня інституцийонального спертя, соспільных ініциятив і новых просторів хоснуваня, такых як цифровы середовиска, творит можливости зміцнія жывотности і будучности меншыновых языків. Завдякы спілпрацы ведучой заряду Linguapax International, віцедиректоркы дс. вельоязычности в Міністерстві Едукациі каталоньского уряду Монікы Переня і директоркы Центра Заанґажуваных Досліджынь над Культуровым Тырваньом Выділу Артес Лібералес Варшавского Універистету Юстины Олько, можливы были спільны варштаты представників меншыновых середовиск, а пак вельоязычна публикация. Внескы зо стрічы находят ся в дописі пн. ”Трансмісия і хоснуваня меншыновых языків в Польщы. Ґенерацийна криза?”, створеным представниками лемківской, кашебской, вілямівской, шлезской і дзукійской/литовской меншыны. Лемківску меншыну репрезентує Наталия Малецка-Новак. 13. річник часопису Linguapax Review єст доступный в одкрытій формі на сайті орґанізациі.

Промоция «Контекстуального словника лемківского языка»

Припоминаме, што в найблизшу пятницю 20. марця на Ягайлоньскым Університеті в Collegium Maius одбуде ся стріча з проф. Оленом Дуць-Файфер і членами словникового ансамблю, в рамках котрой буде запрезентуваный «Контекстуальный словник лемківского языка». В дискусиі участ возмут тіж языкознавцi – проф. Мацєй Рак і проф. Генрик Фонтаньскій. В рамках проґраму промоциі публикациі одбуде ся выступ ансамблю Лада і музичного дуету Дариі Кузяк та Ольгы Стариньской. Вступне на подію дармо. Початок о 15:00 год. На подію просят Ягайлоньскій Університет, Выдавництво Академіцка Книгарня і Музей Ягайлоньского Університету.