Сумар дня на 18. марця 2026 р.

Приносиме вам сумар медияльной ґрупы ЛЕМ.фм+ на ден 18. марця 2026 р.

Роботы над обводницьом Ґорлиц

В понедільок 16. марця в Каштели в Шымбарку одбыло ся торжественне переказаня догваріня, якє тыкат опрацуваня концепцийной документациі для будовы західньой обводниці Ґорлиц. Подіі товаришыла пресова конференция, в котрій участ взяли пармляментаристы і самоурядовці. Малопольскє Воєвідство репрезентувал маршалок Лукаш Смулка, а місто Ґорлиці – бургомайстер Рафал Кукля. Підписане догваріня тыкат опрацуваня вельовариянтовой концепциі будовы західньой обводниці Ґорлиц в рамках воєвідской дорогы но 977. Документацию зрыхтує фірма Sweco Polska з Познаня, а єй кошт то близко 2,5 млн зл. Выконавця має два рокы на зрыхтуваня паперів. Документы мают дозволити самоурядови воєвідства рыхтувати дальшы етапы інвестициі. Плянувана обводниця буде мала за задачу вывести транзитовый рух поза забудувану част міста, поправити переіздніст і безпеку на дорозі но 977 і звекшыти комунікацийну доступніст Ґорлиц і сусідніх ґмін.

Члены Спільной Комісиі Уряду та Нацийональных і Етнічных Меншын будут мати засіданя

XCI пленарне засіданя Спільной Комісиі Уряду та Нацийональных і Етнічных Меншын одбуде ся в будучый віторок 24. марця в головній сідибі Міністерства Внутрішніх Справ і Адміністрациі в Варшаві. В порядку засіданя є омовліня інформациі міністра о поділі дотаций на 2026 рік на задачы, котрых цілю є охорона, захованя і розвиток культурной достоменности меншын. Черговым пунктом засіданя є выступліня представника Міністерства Наукы і Высшого Шкільництва, підсекретаря стану проф. Анджея Шептицкого пн. «Проблематика нацийональных і етнічных меншын та хоснувателів реґіонального языка з перспективы Міністерства Наукы і Высшого Шкільництва». Порядок засіданя передвидує тіж омовліня становиска урядовой страны взглядом внесків меншыновой страны Комісиі о зміну Карного Кодексу і Кодеску Карного Поступуваня та дискусию о стані робіт над «Державном Стратеґійом до справ борбы з антисемітизмом і підпераня жыдівского жытя».

Ювілей Рыманова

В вікенд ювілей 650-літя празднувал курорт Рыманів. В неділю одбыла ся принагідна літургія, а вчера самоурядовці, політикы і представникы мундуровых служб стрітили ся на святі в Домі Культуры. Были промовы, історична прелекция і дискусия о будучым ґміны. Одбыла ся тіж святочна сесия Рады Міста, підчас котрой званя почестного громадянина міста отримал Войцєх Фарбанец – долголітній володар міста, за котрого побудувано нову сідибу Уряду Ґміны, одновлено рынок, выбудувано спортовый комплекс, выремонтувано дорогы. Рыманів, місто з богатом історийом – мало моменты векшого і меншого розвитку, столітями полнило оборонну функцию і было осередком гандлю вином і сольом. Было тіж вельокультуровым місточком – жыла гын велика соспільніст Жыдів, німецкы осадникы, Полякы, а в сусідніх селах мешкали Лемкы. В Рыманові свою першу сідибу мала Апостольска Адміністрация Лемковины, в котрій урядувал адміністратор о. др Василий Масцюх. Днес Рыманів рахує коло 3,5 тис. осіб, а ціла ґміна – коло 15,5 тис. осіб.

Рыхтуют Упрощены Пляны Управліня Лісами

Повітове Староство в Ґорлицях зачало реализувати задачу, в рамках котрой будут опрацуваны на новый 10-літній період Упрощены Пляны Управліня Лісами на рокы 2026-2036 для лісів, котрых властителями сут фізичны особы, а лісы находят ся на терені Ґміны Санкова. В звязку з тым, в найблизшым часі в лісах будут проходити тереновы роботы ведены таксаторами фірмы LAS-R. Ґміна Санкова інформує, што Проєкты Упрощеных Плянів Управліня Лісами будут выложены до публичной візиі в сідибі ґміны. О терміні властителі лісів будут поінформуваны.