Сумар дня на 20. марця 2026 р.

Приносиме вам сумар медияльной ґрупы ЛЕМ.фм+ на ден 20. марця 2026 р.

Вмер русиньскій активіста, доктор медицины Михаіл Завадяк

Як інформувал голова Русиньского Культуролоґічного Клюбу Юрий Шыпович, в віторок 17. марця вмер, маючы 89 років, Михаіл Завадяк, лікар, русиньскій активіста з Підкарпатя, автор дакількох книжок. Завадяк, котрый был автором або спілавтором десяток науковых робіт і шестьох книжок, был честным членом Русиньского Літературно-культурного Общества і членом свалявского Общества Підкарпатскых Русинів. Вічна Памят!

В Попраді засідал Кєруючый Комітет дс. спілпрацы Малопольского Воєвідства і Пряшівского Самосправного Краю

В минулый понедільок в словацкым Попраді одбыло ся дальше засіданя Кєруючого Комітету дс. спілпрацы Малопольского Воєвідства і Пряшівского Самосправного Краю. Засіданя вели представникы власти обох реґіонів: віцемаршалок Вітольд Козловскій і віцепредседа Штефан Бєляк. Стріча была нагодом підсумувати діяня з 2025 р. і омовити дальшы напрямы спілпрацы в обшыри транспорту, дороговой інфраструктуры, едукациі, культуры і туристикы. Важном темом были проєкты INTERREG та спільны ініциятивы в новій фінансовій перспективі на рокы 2027-2034. Спілпраца обох реґіонів тырват од 2003 р. Участникы підчеркнули, што дальше поглубляня реляций буде спомагало соспільно-економічный розвиток реґіонів і зміцняло іх позицию в Середній Европі.

Меншынова сторона СКУтНіЕМ стрітила ся з новым Маршалком Сойму

17. марця представникы меншын засідаючы в Спільній Комісиі Уряду та Нацийональных і Етнічных Меншын стрітили ся з новым Маршалком Сойму Влодзімєжом Чажастым. Спілведучый Комісиі Григорий Куприянович підкрислил вагу історичной памяти і передал Маршалкови «Білянс одкрытя 2023. Нацийональны і етнічны меншыны в Польщы – найважнійшы проблемы середовиска нацийональных і етнічных меншын». В стрічы брали участ представникы лемківской, білоруской, литовской, німецкой, словацкой, украіньской, жыдівской, караімской, ромской і кашебской меншын. Вказали они на потребу пильных системовых змін, м.ін. в освіті, культурным жытю, змін тыкаючых присутности в медиях, парляментарной репрезентациі і фінансуваня меншын. Бесідувано і о новелизациі меншынового закону, цілю зліпшыня условій захованя достоменности громанян.

Великодні Торгы в Державным Етноґрафічным Музею в Варшаві. Выступит Кычера.

В найблизшу неділю 22. марця Державный Етноґрафічный Музей в Варшаві просит на Великодні Торгы. Подія одбуде в год. од 10.00 до 16.00. Як подає інституция, марцьова акция то нагода видіти і купити унікатны, ручні зроблены предметы, м.ін. великодні прикрасы, писанкы, пальмы і вшелеякы артистичны творы. На подіі запрезентуют ся заєдно народны творці, одкликуючы ся до традицийного і реґіонального ремесла, як і особы інспіруючы ся естетиком сучасного дізайну. В рамках Торгів пройдут і товаришучы подіі: варштаты ремесла, концерты, родинны анімациі. Для діти заплянуваны сут варштаты в едукацийным просторі посвяченым Лемкам. На 16.00 год. Музей просит на вынятковый, годинный концерт, на котрым запрезентує ся Лемківскій Ансамбль Пісні і Танця Кычера. Окрем головного концерту Кычеры будут тіж коротшы музичны выступы в голю Музею. Вступне на подію в рамках білету вступу на вшыткы выставы. Мож го придбати в касах або на сайті Музею.

Лемківско-погіряньскій великодній ярмак в Лоси

В тот сам ден, в неділю 22. марця, в Мазярскій Загороді в Лоси одбуде ся Лемківско-погіряньскій великодній ярмак. Подія зачне ся о 11.00 год. Буде кєрмеш ремесла, реґіональна кухня од Кружка Сельскых Ґаздынь в Лоси, а окрем того варштаты писанок, струганых яєц, малюваных лжыц, пальм, прикрас з сіна і соломы і дальшых. Будут і великодні забавы. Подію завершыт великодній концерт, якій одбуде ся о 15.00 год. в лосяньскій церкви.