Сумар дня на 23. марця 2026 р.

Приносиме вам сумар медияльной ґрупы ЛЕМ.фм+ на ден 23. марця 2026 р.

На Ягайлоньскым Університеті в Кракові одбыла ся презентация «Контекстуального словника лемківского языка»

В пятницю, 20. марця на Ягайлоньскым Університеті в Collegium Maius одбыла ся презентация «Контекстуального словника лемківского языка» з участю проф. Олены Дуць-Файфер і членів словникового ансамблю. В дискусиі над публикацийом взяли тіж участ языкознавцi – проф. Мацєй Рак і проф. Генрик Фонтаньскій. Стріча згромадила чысленну публику – м.ін. представників наукового середовиска, Лемків і особы заінтересуваны лемківскым языком і культуром. На подіі присутны были члены словникового ансамблю: проф. Павел Малецкій, Моніка Тылявска, Севериян Косовскій, др Марта Ватраль, Анна Масляна і Наталия Малецка-Новак – ведуча Стоваришыня «Руска Бурса» в Ґорлицях, a тіж другы спілтворці словника і особы підпорюючы його прирыхтуваня. За Стоваришыня Лемків, котрого Заступцьом Ведучого єст проф. Дуць-Файфер, присутный был м.ін. Ведучый ГЗ Андрий Копча. Мартін Караш выступил як Председа Русиньской Оброды на Словациі та як Член Світовой Рады Русинів. Інститут Русиньского Языка і Культуры Пряшівского Університету репрезентували др Михал Павлич, др Зденка Цітрякова і Домініка Новотна. В рамках проґраму промоциі публикациі одбыл ся выступ ансамблю Лада і музичного дуету Дариі Кузяк та Ольгы Стариньской.

Середкы на ремонтово-консерваторскы працы в церквах в ґміні Команьча

Воєвідскій Уряд Охороны Забытків в Перемышли оголосил спис дотаций на 2026 р. В одповіди на 340 внесків, уряд передал на ремонтово-консерваторскы працы 7 892 000 зл. Середкы трафлят тіж до обєктів в ґміні Команча, в тым церкви в Радошыцях – на продолжыня прац при престолі і дарохранительници та церкви в Смільнику – на консервацию поліхроміі. Дальшы середкы трафлят до храму в Вислоку Великым на ремонт стін ризниці і олтаря. Церков і дзвінниця в Щавным отримают середкы на дальшый етап прац при покрытю стріхы, а церков і дзвінниця в Туряньску – на ремонт систему Сиґнализациі Вламаня і Нападу.

«Кычера» буде репрезентувала лемківску культуру і Польщу на найбарже престіжным фестівали танця на світі

Як інформувал Юрий Стариньскій, Лемківскій Ансамбль Пісні і Танця «Кычера» был вытипуваный до репрезентуваня Польщы на єдным з найбарже престіжных фестівалів-танцювальных конкурсів на світі «Cheonan World Dance Festival 2026» в Полудньовій Кореі. Кычера, як репрезентант Польщы, буде ся змагала з парудесятьома ансамблями з цілого світа. В жырі, котре оцінят презентациі, засідают вызначны специялисты в обшыри танця з цілого світа. Фестівальовы презентациі обзерают тисячы люди. Кычера хоче зобрати на тот фестіваль іх найміцнійшу танцювальну ґрупу. Зато до спільпрацы просят не лем актуальных, але і бывшых танцюристів, котры одышли з ансамблю дост недавно, же памятают іщы проґрам, та можут выіхати на тыжден до Азиі на зламі вересня/септембра і жолтня/октобра. Зголошувати ся мож до 12. квітня/апріля, на майльовый адрес: kyczera@wp.pl. Буде то нагода репрезентувати лемківску культуру і Польщу на найбарже престіжным фестівали танця на світі.

Ватра Михалів жде на охочых до спільного творіня 46. Лемкіской Ватры на Чужыні

Орґанізаторы Лемківской Ватры на Чужыні просят до спільного творіня ближучой ся 46. Лемкіской Ватры на Чужыні, яка пройде в Михалові на Нижнім Шлеску в днях 31. липця/юлия – 2. серпня/авґуста. Мож діяти в выбраным ансамбли: артистичным – при проґрамі і спілпрацы з артистами, промоцийным – творячы зміст на соспільны медиі, та спортовым – помагаючы при рыхтуваню вартровиска. Заінтересуваны можут писати на майль: watramichalow@gmail.com. Орґанізатором Лемквской Ватры на Чужыні єст Стоваришыня Лемків.