Сумар дня на 27. марця 2026 р.

Приносиме вам сумар медияльной ґрупы ЛЕМ.фм+ на ден 27. марця 2026 р.

Ярослав Королівскій в Раді Бізнесу при Президенті Польской Республикы

25. марця в Президентскым Палаци в Варшаві прошла подія покликаня Рады Бізнесу при Президенті Польской Республикы. Рада Бізнесу становит форум спілпрацы представників приватного сектора з Канцелярийом Президента Польской Республикы. Єй цілю єст спераня головы державы дорадчым голосом і выпрацуваня конкретных розвязань підтримуючых розвиток підприємницкой діяльности та зміцняючых конкуренцийніст польской економіі. В склад рады вошли досвідчены підприємці і председы найвекшых польскых фірм, репрезентуючых ріжнорідны секторы економіі. Акты покликаня вручыл членам Рады Президент Кароль Навроцкій. Серед покликаных до Рады Бізнесу нашол ся Лемко з Ганчовы – Ярослав Королівскій, презес і спілоснователь компаніі Synerise – єдной з найбільше заавансуваных технолоґічных фірм в Европі. Ярослав Королівскій єст тіж дослідником і выкладовцьом Технічного Університету в Кракові (AGH). Од 2020 р. был спілвластительом футбольовой компаніі Вісла Краків, а актуально є векшыновым акцийонером і презесом клюбу. Являт ся приватным спонсором локальных клюбів і ініциятив. Компанія Synerise творит опроґрамуваня, якого основом є штучна інтеліґенция (АI) та big data. Быват присутный і в лемківскым середовиску. 10. лютого/фебруара тр. Ярослав Королівскій был тіж запрошеный до спілпрацы Премєром Дональдом Туском, як член Рады Будучности – дорадчого орґану Премєра, што рыхтує рекомендациі діянь і рішынь, якы мают підтримувати дальшый розвиток Польщы.

«Талергоф. Лаґєр інтернуваня Русинів»

До офіцияльной продажы трафила дальша книжка печатана Стоваришыньом «Руска Бурса» в Ґорлицях. То збірка дописів посвяченых австрийскому лаґрови інтернуваня в Талергофі. Лаґєр тот занимат особливе місце в істориі русиньского населіня габсбуржской монархіі періоду І світовой войны. Основаный в 1914 р. як пункт примусового одсепаруваня осіб вызнаных властями за політичні підозрены, лаґєр стал ся нарядьом системовых репресий ґу ґалицийскым Русинам, в тым Лемкам. В 2024 р., в 100. річницю основаня лаґру, Стоваришыня «Руска Бурса» во спілпрацы з Музейом Дворы Карвациянів і Ґладышів в Ґорлицях зорґанізувало наукову конференцию посвячену проблематиці Талергофу. Нова публикация громадит рефераты выголошены підчас конференциі, опрацуваны в формі науковых дописів. Том был дополненый і о додатковы тексты, што пошырюют підняту проблематику заєдно о дослідничу, як і спільнотову перспективы. Книжку пн. «Талергоф. Лаґєр інтернуваня Русинів» можете придбати в нашым інтеретовым склепі або в Рускій Бурсі в Ґорлицях.

Варштаты малюваня яєц в Рускій Бурсі

Припоминаме, што уж в найблизшу неділю, 29. марця, в Рускій Бурсі в Ґорлицях одбудут ся варштаты малюваня яєц. Традицийні стрічаме ся в Квітну Неділю, але тым разом – за григорияньскым календарьом. Варштаты зачнут ся о 15.00 год. Орґанізаторы забезпечают материялы – будут на Вас чекати: зварены яйця, фарбы і воск до малюваня. Вчас спільной стрічы продолжана буде традиция рыхтуваня великодніх писанок батіковом методом – розтопленый воск наносит ся на верхню верству яйця, хоснуючы метальовый писалец з головком. Вступне очывидно дармо. Красні просиме!

Джерело фотоґрафіі: www.prezydent.pl | Марек Боравскій KPRP