Сумар дня на 16. квітня 2026 р.

Приносиме вам сумар медияльной ґрупы ЛЕМ.фм+ на ден 16. квітня 2026 р.

Великодні богослужыня на Святій Горі Явір

Третього дня Пасхы на Святій Горі Явір одбыли ся торжественны богослужыня. Православный архієпископ Паісий враз з духовенством одправил пасхальну Літургію. Перед тым владыка справил лекторску хіротонію над Фомом Болехом, семінаристом ІІ рока в Православній Духовній Семінариі в Варшаві. Вчас богослужынь вознесено молитвы за митрополиту Саву, якій наступного дня святкувал свій ден народин, а тіж за вшыткых жертводавців будовы новой церкви на Яворі. Фома Болех походит зо Ждыні. Активно бере участ в жытю свойой рідной парохіі і перемышльско-ґорлицкой єпархіі – од 25. жолтня/октобра 2025 р. єст ведучым Братства Перемышльско-Ґорлицкой Єпархіі.

Бардиівскій скансен прийме туристів

З приходом ярных місяців постепенно одкрывают ся брамы експозиций народной архітектуры – скансенів, і тым самым сприступнюют ся унікатовы деревяны храмы на Словациі. Того рока в центрі увагы буде головно скансен в Бардиівскых Купелях, котрый вступує до ювілейного 60. сезону по найвекшых інвестициях в своій найновшых істориі. В бардиівскым скансені сут і цінны деревяны будівлі з русиньскых сел, медже інчыма сакральны будинкы з Микулашовой (даколи Никлова), Нижнього Верлиха ци Збоя. Окрем хыж і ґаздівскых будинків в ареалі находят ся два сакральны обєкты. Іде о гекокатолицкій деревяный храм зо Збоя і меньшый грекокатолицкій храм з Микулашовой, якій є з 1730 р. Обидва храмы сут в добрым стані, дают хоснувати ся і на літургічны потребы. В ареалі прибыли і новы технічны інтересности. Медже найвызначнійшы належыт фунґуючый половый гончарскій пец.

В Маластові і Панкій будуют канализацию

Тырвают працы над реализацийом інвестициі пн. «Будова сіти санітарной канализациі в місцевости Маластів – Панкна». Долгіст інвестициі то ок. 4,7 км. Цілю є поправa якости жытя жытелів ґміны Санкова через звекшыня доступу до санітарной інфраструктуры. Реализация задачы буде значуча тіж для цілой ґміны, влияючы на розвиток технічной інфраструктуры і стандард комунальных услуг. Цілковита вартість дофінансуваня выносит 2 834 000 зл. То важный крок в напрямі дальшого розвитку ґміны Санкова і поправы условій жытя жытелів.

Уж заран важна стріча о лемківскым языку

А уж заран в Рускій Бурсі в Ґорлицях одбуде ся стріча, котра посвячена лемківскому языкови пн. Як розвивати лемківскій язык? Вчыня, материялы і інспірациі. Презентация о можливостях і потенцияльных методах вчыня лемківского языка – ци то в рамках формальной едукациі ци поза школом. Стріча має быти нагодом до того, жебы подумати над тым, як творити і хоснувати материялы, котры реальні підперают розвиток языковых компетенций в нашым середовиску. Презентацию выголосят дослідникы Варшавского Університету і Університету Адама Міцкєвича в Познані: Аґнєшка Отвіновска-Кателяніц, Анна Щепаняк-Козак, Емілия Вонсікєвич-Фірлей і Томаш Віхеркєвич. Підчас прелекциі представлены будут інспірациі і практичны розвязаня, котры можут помочы в будуваню і підпераню языковых ресурсів – дома, в спільноті, культурі ци діґітальным просторі. Стріча орґанізувана єст в рамках медженародного проєкту Fosterlang.