Сумар дня на 20. квітня 2026 р.

Приносиме вам сумар медияльной ґрупы ЛЕМ.фм+ на ден 20. квітня 2026 р.

Карпаторусиньска Рапсодия в Carnegie Hall в Ню Йорку

Фундация Ars Activa і Lemko Association просят на вечер з сакральном, фольковом і клясичном музиком з назвом Карпаторусиньска Рапсодия. Подія пройде в вынятовым місци – Carnegie Hall в Ню Йорку, т.є. єдній з найбажре престіжных концертовых галь на світі. Як заявляют орґанізаторы, концерт буде незабытом і зворушаючом подорожом через богату дідовизну карпаторусиньской музикы. Одбуде ся він 27. мая. Дрібниці і продаж білетів находят ся на інтернетовым сайті Carnegie Hall. Заінтересуваны мусят ся поспішыти – остало уж лем дакілько свобідных місц.

«Выкорінены– Лемкы в Ґалициі і в чужым краю» – выклад в Мюнхені

В Домі Німецкого Сходу в Мюнхені, в Німцьох, буде мож неодолга выслухати выклад з темом «Выкорінены– Лемкы в Ґалициі і в чужым краю». Выклад выголосит в четвер 7. мая проф. др Беата Галицка. Як чытаме в описі подіі: стріча буде посвячена істориі Лемків, іх выгнаню і осаджыню в Ґалициі та діаспориці. Выклад направленый на польску заграничну соспільніст.

В Вапенным возникне стежка в коронах дерев

Ґміна Санкова інформує, што підписала догваріня на стежку в коронах дерев. Курорт Вапенне збогатит ся о нову туристичну атракцию уж в 2027 р. Стежка в коронах дерев возникне в рамках позысканых зовнішніх середків з Реґіонального Операцийного Проґраму. Цілковитый кошт задачы з назвом «Будова видокового місця з помостом і спацеровом стежком в Вапенным» то близко 5 млн 777 тис. злотых. Догваріня з выконавцьом было підписане в минулым тыжни. Передвидуваный термін завершыня реализациі задачы то вересен/септембер 2027 р.

«Містериюм штоденности» – выстава творів Новосільского в Левкові

Од 24. мая тр. в Музею в Левкові буде мож обзерати выставу творів Юрия Новосільского пн. «Містериюм штоденности». На експозициі буде мож видіти 23 творы Новосільского з колекций Музею Штукы в Лодзи, Нацийонального Музею во Вроцлаві, Католицкого Люблиньского Університету і приватной колекциі. Выставі буде товаришыл богатый едукацийный бльок, малярскы варштаты для шкіл, варштаты писаня ікон, проєкциі фільму і выклады. Зрыхтуваный буде і каталоґ, в котрым части тыкаючы артисты опрацує Кристина Черні. Окрем того др Черні выголосит выклады на одкрытя і фінал експозициі. Выстава буде презентувана на терені Палацово-Паркового Комплексу в Левкові до 16. жолтня/октобра тр.

Промоция публикациі «Незавершена бесіда. Новосільскій і Ружевич»

В тым місяци Державный Выдавательный Інститут одпремєрувал книжку пн. «Незавершена бесіда. Новосільскій і Ружевич» Радослава Романюка. Публикация єст пробом описати реляцию двох творців, котрых лучыла не тильо спільнота поглядів, а свідоміст взаємной пристутности. Стріча вколо книжкы одбуде ся в найблизшый четвер 23. квітня/апріля в книгарни Державного Выдавательного Інституту в Варшаві. В дискусиі возмут участ автор – Радослав Романюк, і Кристина Черні, поведе єй Катажына Вуйцік. Початок о 18.00 год.