В Ужгороді одпрезентовали нову книгу Тетяны Мороляк

Як інформовав голова Русиньского културолоґічного клубу Юрій Шиповіч, в суботу 18-го апріля 2026-го року в Ужгородьскій публічній бібліотеці одбыла ся презентація новой книжкы русиньской писателькы Тетяны Мороляк. Книга, яка має назву Про Олену Божу, вышла в ужгородьскім выдавательстві РІК-У.

Тетяну Мороляк русиньскы чітателі можуть знати вдяка тому, же їй творы уж реґуларно публікує Алманах днешньої русинської літературы, котрый выходить на Підкарпатю. Пише нелем на русиньскім, але і на україньскім а російскім языку. У 2019-ім році одкрыла в Ужгороді літературный клуб Іскра душі, і актівно занимать ся його розвойом.

„Про Олену Божу – тепле і щіре оповіданя, написане жывым русиньскым словом, котре звучіть так, якбы ся родило прямо з уст простых людей,“ пише ся в анотації новой книгы.

„У центрі твору – доля благой, набожной і робітной жены Олены, котру в селі звали Божов за їй доброту, щірость, служіня людям і церькви. Авторка майстерно передає атмосферу сільского жытя, духовных цінностей і моралных проводників, близкых русиньскій ідентічности. Твор утверджує віру в то, же за добро Бог нагороджує добром, а серенча приходить до тых, котры жыють із чістым сердцьом.“

Як інформовав Шиповіч, презентація, котру вєдно із авторков приготовили членове Русиньского културолоґічного клубу, одбыла ся із великым успіхом. Участны были і Михаіл Сарканич – голова Свалявского общества підкарпатьскых Русинів, голова Народной рады Русинів Закарпатя Євген Жупан, але і далшы русиньскы актівісты.

На презентації окрем авторкы новой книгы – Тетяны Мороляк, выступили і Анна Меґела – редакторка книгы і авторка спередслова, высокошкольскый педаґоґ, літературознатель із Інштітуту русиньского языка і културы Пряшівской універзіты в Пряшові – Валерій Падяк, Євген Жупан, і далшы.

Фото: Микола Поцко.