Змаганя з русиньского языка в Дюрдьові

Як інформовала аґентура Рутенпрес, в сербскім Дюрдьові в суботу 18-го апріля 2026-го року одбыло ся 15-те Меджіокружне змаганя з русиньского языка і языковой културы.

На змаманю брали участь школарі од пятой по восьму класу, вєдно 49 дітей. 31 школярів было із школ, де мають навчалный язык русиньскый, і 18 дітей пришло із школ, де мають навчаня русиньского языка з елементами націоналной културы.

Діти, котры мають навчалный язык русиньскый, пришли із Руського Керестура, Коцура і Дюрдьова, далше змагали ся діти із Коцура, Нового Саду, Кулы, Бачской Тополі, Шіду і Нового Орахова, котры мають на школі навчаня русиньского языка.

Змаганя орґанізовало Міністерство освіты Републікы Сербія, Інштітут про русиньскый язык, літературу і културу, а містна Основна школа Йован Йовановіч Змай.

25-го мая в тій самоій школі одбуде ся Републікове змаганя з русиньского языка і языковой културы. На тото поступло 23 школярів із меджіокружного змаганя.

Школярям, котры в суботу здобыли перше, друге або третє місце, были вручены Дяковны грамоты од орґанізаторів, як і книжкы од выдавательства Руске слово, і Інштітуту про русиньскый язык, літературу і културу.

Фото: Рутенпрес.