На граді Любовня буде сприступненый цілый ареал

На граді Любовня і в його околіці фіналізують приправы на нову літню сезону. Тот рік навщівникам сприступнять цілый ареал граду, котрый за послідніх 30 років перешов комплетнов реконштрукційов.

Як про аґентуру TASR потвердив директор Любовняньского музея Далібор Микулик, святочне одкрытя літньой сезоны одбуде ся в пятніцю 24-го апріля 2026-го року в сканзені під градом, і о два дні пізніше – в неділю, і на граді.

„Навщівници тот рік дістануть ся до вшыткых частей, обєктів і експозіцій, котры маєме. І вдяка тому, же знова сприступнюєме нову часть граду по обнові, котра дотеперь не была публічно доступна, віриме, же собі до нас знова найдуть драгу,“ повів Микулик.

Минувшый рік быв притім рекордный, бо на Любовняньскый град пришло понад 214 тісяч турістів.

Любовняньскый музей в Старій Любовні старать ся о середньовікый град, підградя і сканзен, што довєдна творить 41 обєктів. Тоты перед сезонов прятали ся і чістили. „Почали сьме уж в децембрі, і кедь сьме добрі раховали, то майже 230 облаків, приблизно 4000 збірковых предметів, і дакілько тісяч метрів квадратных підлог, причім дакотры суть глиняны, і треба їх чістити традічным способом,“ повів Микулик.

В тій сезоні собі припомянуть і 70 років існованя музея. Сприступнены теперь будуть і воєньскы касарні із 18-го столітя, котры так само суть по реконштрукції. „Затля будуть без експозіції, но мале несподіваня про навщівників у тій обновленій части граду рихтуєме,“ інформовав аґентуру TASR директор музея Далібор Микулик.

Фото: Ян Салонь.