Сумар дня на 23. квітня 2026 р.

Приносиме вам сумар медияльной ґрупы ЛЕМ.фм+ на ден 23. квітня 2026 р.

O Лемках і акциі «Вісла»

Заран, в пятницю, о 18.00 год. в Caffe Provincia в Ліґници одбуде ся стріча з Юрийом Стариньскым з циклю «Провінцийональны бесіды о істориі», што присвячена траґічным подіям акциі «Вісла». Орґанізаторы запрашают до рефлексиі над дольом лемківского народу, котрый пережыл насильне выселіня і втрату отчызны. Буде то нагода, жебы присмотріти ся тым подіям через призму особистых листів і споминів. Юрий Стариньскій представит як раз част з той кореспондециі, яка была посылана до ґазеты «Карпатска Русь» в ЗША, а яка недавно вказала ся накладом ЛАПіТ «Кычера». Бесіду буде модерувал Артур Ґузіцкій, якій наштоден робит як журналиста і реґіоналиста. Стріча то головно пропозиция для осіб, якы не сут в темі – дозволит глубше зрозуміти історию і долю Лемків, а тіж вшанувати памят тых, котры стратили свій дім і коріня.

Ближыт ся велика подія в Carnegie Hall в Ню Йорку

Припоминаме, што Фундация Ars Activa і Lemko Association просят на вечер з сакральном, фольковом і клясичном музиком з назвом Карпаторусиньска Рапсодия. Подія пройде в вынятовым місци – Carnegie Hall в Ню Йорку, т.є. єдній з найбажре престіжных концертовых галь на світі. Як заявляют орґанізаторы, концерт буде незабытом і зворушаючом подорожом через богату дідовизну карпаторусиньской музикы. Одбуде ся він 27. мая. Дрібниці і продаж білетів находят ся на інтернетовым сайті Carnegie Hall. Заінтересуваны мусят ся поспішыти – остало уж лем дакілько свобідных місц.

Перемышльскій митрополита прибыл на Лемковину

В неділю, 19. квітня/апріля в рамах канонічной візитациі парохій Ґорлиц, Білянкы та Рыхвалду грекокатолицкій владыка Євген (Попович) очелил Літургію в церкви в Білянці. Разом з митрополитом спілслужыл перемышльскій діакон та парох о. Віталий Бойко і вікарий місцевой римокатолицкой парафіі. По богослужыню вірны подякували владыці за візитацию та спільну молитву. По обіді одбыла ся стріча Архієпископа в біляньській світлици з Душпастырськыма Радами візитуваных парафій. Парох представил присутных членів рад та коротко описал стан довіреных йому парохій. На завершыня владыка підсумувал стрічу, дякуючы вірным і парохови за служыня та творіня жывой громады.

Конференция в Варшаві і лемкіскій язык

Уж денс в Варшаві проходит конференция пн. «Польскы мовы. Язык а достоменніст», яка орґанізувана єст Нацийональным Інститутом Культуры і Спадковины Села. Присвячена єст роли языка в комунікациі і будуваню достоменности. Участникы піднимают рефлексию над тым, ци тоты функциі можут іти в парі, ци вштыкы Полякы так само бесідуют, а кєд ніт, то ци повинны. Явит ся і тема охороны языка: ци тыкат она лем діалектів, ци тіж польского языка. В дискусиі участ берут дослідникы, реґіоналисты і популяризаторы фольку і фольклору. Серед прелеґентів сут представникы шлезской, кашебской, вілямівской і лемківской соспільности. Єдном з выступуючых єст Дария Кузяк.