«Голосы Русинів Підкарпатя» – середа, 18.10 год.

Днешній герой «Голосів Русинів Підкарпатя» Володимір Дяков є корінным Русином, хоць нянько му быв етнічным Українцьом із Вінничины. Але на уліцях Свалявы, де і у совітьскый час бісіда была лем карпаторусиньска, мож было быти так само лем Карпаторусином. А Володимір Леонідовіч ту ся народив і прожыв цілый свій жывот.

Чоловік, котрый робив у хемічнім заводі, грав у дыховім орхестрі і співав у хорі, быв перфектным фотоґрафом, присятив своє жытя шпорту. Зачінаючі з кінця 1970-ых років і доднесь Володимір Дяков тренує діточок, є інштруктором Шотокан карате-до.

Наш гость, окрем уменя ся бити, учіть дітей прінціпы людьскости, котры проповідує і будістічна філозофія і хрістіаньска церьков. Жыє наш герой за прінціпом: «Будеш жыти по совісти – Бог тя поведе правилнов путьов».

Слухайте «Голосы Русинів Підкарпатя» в середу 29-го апріля 2026 р. о 18.10 год., або повторіня в четверь 30-го апріля о 4.30 год. і в суботу 2-го мая о 11.00 год. за русиньскым часом.