Сумар дня на 29. квітня 2026 р.

Приносиме вам сумар медияльной ґрупы ЛЕМ.фм+ на ден 29. квітня 2026 р.

Річниця выселіня і поневоліня

Докладні девят років тому, 29. квітня/апріля 2017 рока в Явожні был одкрытый памятник в рамках лемківскых упамятнінь 70. річниці акциі «Вісла». На памятнику видно інскрипцию в трьох языках, в лемківскым, польскым і анґлицкым: Вязненым і страдавшым / в лаґрі в Явожні / в наслідстві акциі «Вісла» / Лемкам / 29 квітня 2017 рока – Потомны. Упамятніня жертв явожняньского лаґру поставлене было по долгых роках систематичного фальсифікуваня лемківской істориі, поменшаня лемківского терпліня і неспоминаня на Лемків – вязнів явожняньского лаґру двох тоталітаризмів. Перед тым, як трафили до нього м.ін. Лемкы, котры здавали ся комуністичным властям найбарже підозрены в своій невинности, был то підодділ гітлерівского лаґру, знаного в цілым світі під німецком назвом Аушвіц. Комуністы, котры силами Червеной Арміі в 1945 році освободили од гітлерівців місце смерти мілийонів Жыдів, Циґанів, та вельох інчых народів, рішыли схоснувати го в тій же ціли. З том ріжницьом, же од 1947 рока были там вязнены Лемкы, Украінці і інчы выселенці. Як раз вчера прошла 79. річниця од початку акциі «Вісла», коли польскы комуністичны власти насильно выселили Лемків з іх рідной землі. Підчас транспорту на західні землі выгнана част Лемків трафила до лаґру в Явожні. По звільніню мали заказане розповідати о тым, што іх там стрітило – як были поневолены і мучены. Памятник в Явожні на все припоминат о тых діях.

Высокопреосвяченный владыка Йона Максим візитує вшыткы парохіі

В неділю 26. квітня/апріля село Ґерляхів, бардиівского окресу, одвиділ Высокопреосвяченный владыка Йона Максим, пряшівскій архієпископ і митрополита, котрый завершыл тым канонічну візитацию парохіі. Владыка одслужыл Божеску Літургію в містным Храмі святого Михаіла Архістратига, пак голова Грекокатолицкой Церкви на Словациі стрітил ся з вірныма в містній фарі. Пополудне владыка разом зо своім секретарьом – отцьом Михалом Павлишком, і адміністратором парохіі – отцьом Мартіном Козейом, одвиділи хворых з парохіі в іх хыжах. Митроплита оголосил на тот рік початок канонічных візитаций цілой архієпархіі, котры будут поступно реализуваны підчас найблизшых років. Того рока візитациі зачали ся в марци, од парохіі в Бехерові і Млинарівці.

Парохіяльне свято православной церкви в Ліґници

В великодню суботу 18. квітня/апріля православна парохія Воскресіня Христового в Ліґници празднувала своє парохіяльне свято. Того дня до ліґницкой спільноты пришол Його Высокопреосвященсто Юрий, архієпископ вроцлавскій і щеціньскій, православный ординарий Польского Войска, якій в астисті священників єпархіі і з заграниці одслужыл Божеску Літургію. В проповіди архієпископ Юрий бесідувал о елементах пасхальной теолоґіі, а по богослужыню звернул ся до вірных зо словами, в котрых підкрислил важніст факту Воскресіня в жытю чловека. Спомнул тіж о 100. річници повороту Лемків до православія. На закінчыня місцевый парох о. Любомир Воргач подякувал вшыткым за присутніст – так вірным, як і священникам. Розділяти радіст парохіяльного праздника пришли м.ін. о. митрат Марек Боніфатюз з парохіі в Зґожельци, о. ігумен Юрий Омелянюк, парох в Бучыні ци о. протодіакон Мєчыслав Олеснєвич з катедральной парохіі во Вроцлаві.