Сумар дня на 28. мая 2026 р.

Приносиме вам сумар медияльной ґрупы ЛЕМ.фм+ на ден 28. мая 2026 р.

Комунікат лемківскых орґанізаций

Вчера пят лемківскых орґанізаций оприлюднило спільне становиско, котре односит ся до подій, якы прошли 9. мая 2026 р. на обшыри Православной Парохіі в Ґладышові. Сиґнаратиі документу єднозначно одтинают ся од жестів і діянь, котры можут быти інтерпретуваны як высловліня попертя середовиск або орґанізаций повязаных з Росийском Федерацийом. Іде о подію – приізд орґанізациі, яка одкликує ся до росийской символикы. В освідчыню підкрислено значыня одповідальности за символы присутны в публичным просторі і тото, што необхідным є, жебы уникати такого діяня, котре може вести до напружености і поділів. Орґанізациі потверджают своє привязаня до вартости діалоґу, мирного спілістнуваня і пошануваня культурной спадковины. А тіж зас поновили свій спротив взглядом росийской аґресиі в Украіні. Під писмом підписали ся Стоваришыня Лемків, Стоваришыня «Руска Бурса» в Ґорлицях, ЛАПіТ «Кычера» з Ліґници, Музей Лемківской Культуры в Зындрановій та Стоваришыня Лемко Тавер.

Чытайте свіжы «Бесіду»

Перед минулым 13. Медженародным Бієнале Лемківской / Русиньской Культуры – РутенАле (якє одбыло ся в днях 23.-24. мая в Креници, Устю Рускым і Высовій) явил ся дальшый номер часопису «Бесіда» – пресового орґану Стоваришыня Лемків. То ч. 2 (209) за місяці марец/квітен тр. В посліднім номері прочытаме м.ін. архівный допис покійного історика Підкарпатской Руси Івана Попа, інформацию Северияна Косовского о выставі творчости Епіфана Дровняка в Ліґници, допис Петра Трохановского пн. «Никыфор. Одкрытя едукацийной салі в Центрі Культуры в Креници». Дальше єст рецензия Андрия Копчы о Опері «Голос». Проф. Олена Дуць-Файфер пише о Контекстуальным словнику лемківского языка. Єст тіж допис Демка Трохановского о о. Василию Масцюху, першым Апостольскым Адміністраторі Лемковины, і Наталиі Малецкой-Новак о варшавскій выставі «Формы присутности. Штука Лемків/Карпатскых Русинів». Номер тот припоминат і о прекрасным ювілею 95-літя народжыня Ольгы Перегрим, акторкы Театру Стоваришыня Лемків. Єст і смутна част – де пращаме Покійного Славомира Канюка.

«Прикликаня. Лемковина в діалоґу штукы і поколінь» – іщы мож видіти

Іщы лем до пару дни, бо до 31. мая в Ряшові буде мож обзерати выставу творів двох артисток: Марты Криницкой-Ожех і Барбары Губерт, пн. «Прикликаня. Лемковина в діалоґу штукы і поколінь». Хоц артисткы хоснуют окремы малярскы языкы, лучыт іх рефлексия над памятю місця, досвідчыньом погранича і культурном спадковином Лемковины. Презентуваны роботы творят вельовымірову оповіст о істориі, достоменности і о тым, што минуло. Марта Книницка-Ожех в своій артистичній практиці консеквентні сігат до дідицтва Лемків. В презентуваным на выставі цикли «Прикликаня» розвиват скоршы заінтересуваня іконом, але в інтерпретациі ясно осадженій в сучасным малярскым языку. Творчiст Барбары Губерт хоснує інчу візуальну стератеґію, але так само міцно осаджену в проблематиці памяти і втраты. Артистка од років піднимат тему неістнуючых місц – бывшых сел, котры заляли під резервуар Солиньского Озера. На выставі презентує пару своiх новых малярскых циклів. Выставу мож видіти в Ґалериі Воєвідского Дому Культуры в Ряшові.

Ґорлицкій шпыталь з дофінансуваньом

Ґорлицкiй повіт нашол ся в ґрупі бенефіциєнтів постановы Соймику Малопольского Воєвідства, котра тыкат фінансового підпертя локальных шпыталів. Цілый реґіон достане разом 3,4 млн зл на інвестициі в охороні здоровля. Соймик Малопольского Воєвіства рішыл признати фінансову поміч самосправным єдиницям з цілого реґіону. Фонды будут перезначены на модернізацию та допосажыня медичных пляцівок. Ґорлицкій повіт отримал 200 тис. зл дофінансуваня. Грошы будут переданы для Шпыталя ім. Климонтовича в Ґорлицях. Завдякы тій помочы шпыталь зможе придбати модерну медичну апаратуру, котра має прямо вплынути на поправу якости діаґностикы і лікуваня пациєнтів.