Конзул і герої або ілузія проґресу

Покля еврокомісарька про розшырьованя Марта Кос пише на сіті X о одкрываню пути ку проґресу на пути Україны ку членству в Европскій унії, реалность є омного прозаічніша, а аж тілько радости бы выкликовати не мала.

Мадярьскый премєр Петер Мадяр оголосив, же досягли комплексный договор із Українов о розшыріню языковых, освітных, културных і політічных прав мадярьской меншыны, котра жыє на Україні.

Подля нового договору Україна обовязала ся обновити сістему школ народностных меншын, де мадярьскый язык „буде слободно ся хосновати“, в селах ці містах, де мадярьска популація пересягує 10 процент, буде позволене „слободне хоснованя народных сімболів“.

Вымінов за тото Будапешт одблокує початок приступовых переговорів, котры дотеперь не могли реалізовати ся вдяка вету, котре дала влада Віктора Орбана. Лемже, ани тото не є таке просте. Петер Мадяр повів, же Мадярьско не є за жаден ускореный приступовый процес, і зорґанізує референдум о україньскім членстві, покля ся Києву „подарить заперти вшыткых 33 приступовых капітол почас слідуючіх 10 аж 15 років“.

Еврокомісарька про розшырьованя уж пише о одкрываню пути, лемже при проявах даякой великой радости бы може треба было быти дакус стриманішым. По перше зато, же Мадяр не дав жадну зелену карту на „фрышком до Европы“, і вступ Україны до Унії хоче наконець і так рішыти референдумом в Мадярску. По друге зато, же Україна гасить пожар в єднім лісі, але в тім самім часі підпалює ліс другый.

25-го мая на основі наряджіня презідента Зеленьского быв на Націоналнім воєньскім меморіалнім цінтері перепохованый Андрій Мельник, котрого ексгумовали із гробу в Луксембурзі, бо голова державы здумала собі робити якыйсь пантеон україньскых героїв.

Сучасный польскый презідент Карол Навроцькый повів, же Зеленьскый додав супер матеріал російскій пропаґанді.

Перепохованый „герой“ быв вождь Орґанізації україньскых націоналістів, колаборант із націстічным Німецьком, якый ся зохабив навербовати до націстічной німецькой воєньской розвідкы Abwher, і дістав там тайне імя Consul I. Тото мають быти герої, „выставны експонаты“ пантеону країны, котра хоче іти до Европской унії?

Уж ся ани не чудую, же з боку европской політічной сцены то зістало веце-менше промовчане, аж на пару вынятків. Што уж не зістало промовчане, то было далше рішіня презідента Зеленьского. Перешли два дні од перепохованя „героя“ і Зеленьскый присвоїв назву Героїв УПА єдному підрозділу Сил шпеціалных операцій.

Бывшый польскый дісідент і презідент Лех Валенса на протест зняв україньскый флаґ із свойой кошулі а повів, же далше буде підтримовати україньскый народ „проти Совітів“, але уж не підтримує презідента Зеленьского. Сучасный польскый презідент Карол Навроцькый повів, же Зеленьскый додав супер матеріал російскій пропаґанді, і запропоновав, жебы україньскому презідентови быв однятый орден, котрый в Польщі дістав.

О „знепокоюючій уровни“ уж бісідовав і польскый премєр Доналд Туск, а властно будьяка обгайоба тотых кроків Зеленьского із оглядом на історічну скушеность Поляків із ОУН а УПА є політічне самоубийство. І так платить скоріше повіджене, же до єдного ліса ішли Українці із водов, жебы гасити, а до другого із швабликами.

Треба собі класти вопросы. Нашто є тото добре київскым властям, робити собі далшого проблематічного сусіда, котрый навеце Україні міцно помагать од початку войны? У кого хоче Зеленьскый, або його оточіня, зберати сімпатії тыма кроками? У радікалів? Або з тыма кроками є згодна векшына гражданів? Но належыть пак така країна, котра честує націстічных колаборантів, до Унії?

Так ці іншак – тото є вшытко, лем не проґрес із україньского боку. Є то ілузія проґресу. Ту ся заграме на меншыновы права, бо нас хтось блокує, але там будеме прославляти колаборантів, бо за тото нас іщі нихто не блокує. А то іщі увидиме, як реално Київ сповнить ці не сповнить пожадавкы Мадярьска.

Такы політічны авантуры суть далеко од того, што днесь кличеме демократічна Европа. Реалность сучасной україньской політікы є далеко од того, жебы ся радовати. А найменше радости бы з того мали мати самы україньскы гражданы, покля то холем они з евроінтеґраційов думають важні.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.