Сумар дня на 5. червця/юнія 2026 р.

Приносиме вам сумар медияльной ґрупы ЛЕМ.фм+ на ден 5. червця/юнія 2026 р.

Дебата в Державным Етноґрафічным Музею в Варшаві: стан культуры і языка Лемків

В четвер 25. червця/юнія в Державным Етноґрафічным Музею в Варшаві пройде выняткова стріча – бесіда, што тыкала буде актуального стану культуры і языка Лемків. Буде она рефлексийом над дідовизном і сучасном присутністю Лемків/Русинів в европейскій культурі. В бесіді возмут участ: Оксана Ґрабан-Ліхтаньска, Наталия Малецка-Новак, Лідия Стефановска, Юрий Стариньскій і Михал Шымко. Подію поведе др габ. Пьотр Маєвскій. Участ в дебаті єст безплатна, треба лем побрати дармовы білеты, доступны за мотузком. Окрем того в тых днях одбудут ся іщы два опроваджаня по выставі «Формы присутности. Штука Лемків/Карпатскых Русинів». 12. червця/юнія опроваджаня поведе куратор выставы Михал Шымко, а 16. червця/юнія тематичне опроваджаня з назвом «Іконы Лемковины» поведе Аґнєшка Клещ. Тым, котры іщы не виділи выставы «Формы присутности. Штука Лемків/Карпатскых Русинів», припоминаме, што буде она вказувана в Варшаві іщы лем до кінця того місяця.

Сербскы власти схвалили Акцийный плян про творіня прав нацийональных меншын

Власти Сербской Республикы схвалили 28. мая тр. Акцийный плян про творіня прав нацийональных меншын на рокы 2026-2029. Інформувала о тым аґентура Рутенпрес. Принятя того пляну є частю сполніня обовязків, котры сут потрібны в приступовых переговорах Сербіі до Европейской Уніі. Акцийный плян обнимат обшыри, котры сут важны про окремы меншыны, як напримір культура, освіта, інформуваня, хоснуваня языка в урядовым контакті. Сут они прямо в компетенциях нацийональных совітів – самосправных орґанів, котры мают нацийональны меншыны в Сербіі. Документ тыкат тіж рівноправной участи мешнын в общественным жывоті, ци забороніня дискримінациі. Документ был прирыхтуваный во спілпрацы з Координацийом нацийональных совітів нацийональных меншын, значыт вшыткы офіцияльно вызнаны меншыны в Сербіі могли брати участ в його творіню. Дрібниці чытайте в дописі на нашым портали.

Ремонт воєнного цмонтеря в Устю Рускым

Цмонтір з І світовой войны нр 57 в Устю Рускым пройде комплексовый ремонт. Порозумліня в тій справі підписали Війт ґміны Устя Рускє Ева Ґарбовска-Ґура і Малопольскій Воєвода. Ґміна отримала на ремонт цільову дотацию в высокости 320 тис. злотых. Цмонтір в Устю єст місцьом спочынку жолнірів, котры згынули в воєнных змаганях в роках 1914 і 1915 в дорічы рікы Ропа в околицях Ждыні, Ганчовы, Бліхнаркы, Шквіртного, Квятони і Устя Руского, або вмерлых в прифронтовым шпытали. Цмонтір был запроєктуваный вызначным артистом Душаном Юрковичом.

«Малопольскiй білет для родины»

Малопольскє Воєвідство припоминат, што в рамках тырваючого долгого вікенду фурт мож скорыстати з акциі «Малопольскiй білет для родины». Оферта тыкат переіздів потягами Polregio, Малопольскых Желізниц і Шлезскых Желізниц на обшыри малопольского воєвідства. Обовязуючы ґеоґрафічны ограничыня поміщено на вебсайті Polregio. Білет можут схоснувати ґрупы од двох до шестьох осiб, мiнiмальнi з єдном дiтином.