Сумар дня на 8. червця/юнія 2026 р.

Приносиме вам сумар медияльной ґрупы ЛЕМ.фм+ на ден 8. червця/юнія 2026 р.

Святочне одкрытя Studium Carpatho-Ruthenorum 2026

Рушат 14. річник Медженародной Літньой Школы Русиньского Языка і Культуры – Studium Carpatho-Ruthenorum 2026. В тым році літня школа проходит в днях од 7. do 27. червця/юнія. Святочне одкрытя школы пройде днес о 18.00 год в просторах Пряшівского Університету. Studium Carpatho-Ruthenorum то шторічный едукацийный проґрам орґанізуваный Інститутом Русиньского Языка і Культуры Пряшівского Університету, заміряный на вчыня русиньского языка, істориі, літературы, культуры і етноґрафіі карпатскых Русинів. Лекциі ведены сут в русиньскым і анґлицкым языках і берут в них участ ученикы з ріжных держав. Є то єдина того типу школа на світі. Проґрам обнимат парудесят клясичных лекцийных годин, але тіж цілый шор додатковых атракций, як презентациі фольклору, прогулькы, театральны і фільмовы вечеры, варштаты і інтеґрацийны стрічы. Тогорічны студенты, окрем інчого, будут мати нагоду звидіти і Руску Бурсу в Ґорлицях, де дознают ся веце о лемківскій культурі, а бодай і о фунґуваню нашого радия лем.фм.

Православны торжества на Святій Горі Явір

В будучым місяци на Святій Горі Явір як што рока православны Лемкы будут празднувати ден святых апостолів Петра і Павла. В тым році одзначена буде там тіж 100. річниця повороту Лемків до православія. Традицийно піде в тым році і піше поломництво на святу Гору Явір, на якє просит Братство Православной Молодежы перемышльско-ґорлицкой єпархіі. 36. уж поломництво тым разом піде шляком Повороту Лемків до Православія. Зачне ся в пятницю 10. липця/юлия в Тыляві, де в каплици одслужена буде св. Літургія, а пак поломникы переіхают до Святковы Великой, одкале підут до Свіржовы Руской, де на цмонтери при руінах церкви св. Йоана Хрестителя служена буде панахіда. Пак підут через Бортне, Баницю і Вірхню до Ґладышова. Другого дня поломництво піде через Смерековец до Квятони, а пак через Шквіртне до Ганчовы, де што рока правит ся вечырні богослужыня перед святом. В ден святя, в неділю 12. липця/юлия поломникы перейдут до Высовы – при церкви св. Архістратига Михала привитаны будут єрархы. Пак вшыткы вірны выйдут вєдно на Святу Гору Явір, де о 10.00 год. буде правлена Свята Літургія.

ХХІХ «Світ під Кычером»

Припоминаме, што неодолга рушыт чергова, 29. едиция Медженародного Фольклористичного Фестівалю «Світ під Кычером». Тогорічный Фестіваль проходил буде в днях од 25. червця/юнія до 6. липця/юлия. Концерты одбудут ся в 11 місцевостях Нижнього Шлеска: Ґурі, Ліґници, Лісци, Ліґницкым Поли, Олесници, Поляниці-Здруй, Шпротаві, Польковицях, Рудній, Заменицях і Желішові. Запрезентуют ся на них ансамблі з Чіле, Чешской Республикы, Еквадору, Ґамбіі, Індиі, Мексику, Польщы, Румуніі, Украіны і Сенеґалю. Вшыткы подіі сут безплатны. Припомнийме, што «Світ під Кычером» был уж трикратно вызнаный FIDAF за найліпшый фольклористичный фестіваль на світі.