Сумар дня на 18. червця/юнія 2026 р.

Приносиме вам сумар медияльной ґрупы ЛЕМ.фм+ на ден 18. червця/юнія 2026 р.

Просиме на 46. Лемківску Ватру на Чужыні в Михалові

В днях 31. липця/юлия-2. серпня/авґуста в Михалові загорит 46. Лемківска Ватра на Чужыні, яку орґанізує Стоваришыня Лемків. В сценічным проґрамі запрезентуют ся русиньскы ансамблі з Польщы, але і заграниці. Окрeм концертiв, варштатів i спільнотового святкуваня, орґанізаторы рыхтуют м.ін. Зону Дискусий i Выміны Поглядів ци стрічу з особами, што рыхтували госла до Контекстуального Словника Лемківского Языка. Будут і дальшы новы атракциі, о котрых орґанізаторы неодолга зачнут шырше інформувати в социяльных медиях. Вступне на Ватру буде мож придбати тіж онляйн. Заохочаме до участи! Наше радийо, як все, тримат мадияльный патронат над подійом.

Неодолга конец найважнійшой русиньской выставы послідніх років

Припоминаме, што о тыжден, в четвер 25. червця/юнія в Державным Етноґрафічным Музею в Варшаві пройде выняткова стріча – бесіда, што тыкала буде актуального стану культуры і языка Лемків. Буде она рефлексийом над дідовизном і сучасном присутністю Лемків/Русинів в европейскій культурі. В бесіді возмут участ: Оксана Ґрабан-Ліхтаньска, Наталия Малецка-Новак, Лідия Стефановска, Юрий Стариньскій і Михал Шымко. Подію поведе др габ. Пьотр Маєвскій. Участ в дебаті єст безплатна, треба лем побрати дармовы білеты, доступны на інтернетовым сайті музею. Тым, котры іщы не виділи выставы «Формы присутности. Штука Лемків/Карпатскых Русинів», припоминаме, што буде она вказувана в Варшаві іщы лем до кінця того місяця.

Молитва памяти в Розстайным

В минулу суботу, 13. червця/юнія, в Святковій Великій одправлено архієрейску Божеску Літургію в ден памяти свв. Мучеників Холмской і Підляшской Землі, а предовшыткым в памят священномученика Павла Швайкы та мучениці – імости Йоанны. Богослужыня проходили традицийно на полянці коло придорожной капличкы, на місци неістнуючого днес лемківского села – поблиз Розстайного. Перед Літурґійом одправлено мале посвячыня воды. Богослужыня очелювал архієпископ перемышльскій і ґорлицкій Паісий во спілслужыню духовенства з ґорлицкого, креницкого і саноцкого деканатів. Церковны співы выконувал хор під дирекцийом Мариянны Ярой. Вчас проповіди до вірных звернул ся о. Лука Копча. По закінчыню Літургіі владыка Паісий підкрислил вартіст мучеництва за віру та навязал до 100. річниці поворотів Лемків до православія.

Тренінґ пожарників в Ґорлицях

В Ґорлицях одбуде ся вынятковый тренінґ пожарників, котрый має не лем навчальный, але і показовый характер. Вчас подіі професийональны ратівникы і добровольці будут вправляти ся в діянях, котры в реальных обставинах служат ратуваню жытя і здоровля люди. Подія одбуде ся уж позарани. Орґанізаторы приготовили сценарий, в котрым участникы будут мусіти одповідати на симулюваны загорожыня. Тоты вправы мают досконалити спілпрацу медже людми, а заєдно дати мешканцям нагоду видіти, як выглядат сучасне ратівництво од кухні. Тренінґ буде одкрытый для публикы. Особы, котры зайдут на місце, будут мочы присмотрювати ся роботі пожарників, обзерати специялистичне выпосаджыня та познати способы діяня в кризовых ситуациях. Занятя проходити будут на ґорлицкым Рынку, при Павілоні Істориі Міста, медже 10.00 а 14.00 год.