Сумар дня на 25. червця/юнія 2026 р.

Приносиме вам сумар медияльной ґрупы ЛЕМ.фм+ на ден 25. червця/юнія 2026 р.

50. літя парохіі в Заменицях

Грекокатолицка парохія св. Йоана Крестителя в Заменицях одсвяткувала свій ювілей 50-літя. До Замениц в суботу 20. червця/юнія пришол з архіпастырскым словом владыка Володимир (Ющак), єпарха вроцлавско-кошаліньскій, а тіж гостинно єпископ Аркадий (Трохановскій), якій завідує ольштыньско-ґданьском єпархійом. На порозі святыні слово привитаня дал о. Павло Березка, теперішній парох заменицкой церкви. В проповіди владыка Володимир спомянул на початкы парохіі і попередніх душпастырів. Істория заменицкой парохіі, як і вшыткых другых грекокатолицкых парохій на чужыні (західніх землях Польщы), повязана є стисло з проведеном в 1947 р. акцийом «Вісла». Як раз до Замениц, Рокыток, Ярошівкы і сусідніх сел трафили выгнаны з Лемковины. Служыня в Заменицах розпочало ся такой тридцет років по акциі «Вісла» – в 1976 р. Офіцийно парохія св. Йоана Крестителя в Заменицях была ериґувана аж в вересни/септембрі 2000 р. В 2005 р. была вознесена церков. То єдна з тых уж нечысленных грекокатолицкых парохій в Польщы, де поєдны части богослужынь сут іщы по церковнославяньскы, а не выключно по украіньскы. Долголітнім дяком є Андрий Перегрим. Вчас літургій в заменицкій парохіі апостольскы чытаня мож было чути по лемківскы.

О лемківскій штуці в Державным Етноґрафічным Музею в Варшаві

Уж днес в Державным Етноґрафічным Музею в Варшаві о 18.00 год. проходит дебата посвячена спадковині і сучасній присутности Лемків/Русинів в европейскій культурі. В стрічы возмут участ представникы науковых, культурных ци медияльных середовиск, якы бесідувати будут о достоменности, языку і выкликах сучасной соспільности Лемків. Бесіда тыкала буде м.ін. історичных наслідств выселінь, іх влияня на фунґуваня спільноты днес – од ослабліня переказу языка по ґеоґрафічне розбитя. Експерты думати тіж будут над рольом медий, едукациі і інтернету в підтримуваню культуры, а тіж над проблемами звязаныма з єй фінансуваньом і присутністю в публичным простори. Орґанізаторы запросили до бесіды проф. Лідию Стефановску, Юрия Стариньского, Окасну Грабан-Ліхтаньску, др Михала Шымко та Наталицю Малецку-Новак. Дебату модерувал буде др габ. Пьотр Маєвскій, культурознавця і социйолоґ з Університету SWPS, знавця антрополоґіі опору і студий над ґруповом памятю.

Практичны варштаты для жытелів Низкого Бескіду

Припоминаме, што в найблизшу суботу на год. 11:00 Стоваришыня «Руска Бурса» в Ґорлицях просит на практичны варштаты для жытелів Низкого Бескіду. Підчас варштатів вкажеме практичны розвязаня, котры помагают жытелям орєнтувати ся в процесах тыкаючых простору, середовиска і локальных інвестиций. Побесідуєме м.ін. о тым: де глядати інформаций о плянуваных інвестициях, як провірити пляністичны документы, якы інституциі одповідают за поєдны рішыня, як корыстати з доступу до публичной інформациі і інформациі о середовиску, коли і як брати участ в консультациях, якы можливости діяня мают жытелі, коли дашто родит іх вантпливости. Будеме працувати на конкретных примірах з ґмін Санкова і Устя Рускє. Варштаты поведе Анна Треіт – архітектка, специялистка дс. охороны природы в Загальнопольскым Товаристві Охороны Птахів. Просиме вшыкых, котрым залежыт на тым, як буде выглядала наша околиця і Низкій Бескід за 10, 20 і 30 років. Варштаты сут безплатны. Подія фінансувана з середків Нацийонального Інституту Свободы – Центру Розвитку Громадяньского Соспільства в рамках Урядового Проґраму Фундуш Громадяньскых Ініциятив NOWEFIO на рокы 2023-2030.

Початок Фестівалю «Світ під Кычером»

Уж заран зачынат ся 29. едиция Медженародного Фольклорного Фестівалю «Світ під Кычером». Першый ґальовый концерт одбуде ся о 19.00 год. на ліґницкым рынку. На карті Нижнього Шлеска лемківска культура враз з культурами інчых народів повандрує і по другых місцевостях: до Олесниці, Ґуры, Замениц, Лісця, Польковиц, Поляниці Здрій, Рудной, Желішова, Шпротавы і Ліґницкого Поля. Toго рока окрем ансамблів з Польщы, тіж тых, што вказуют лемківску культуру, запрезентуют ся артисты з Чіле, Чешской Республикы, Еквадору, Індиі, Ґамбіі, Мексику, Румуніі, Сенеґалю і Украіны. Приіздны колективы в рамках фестівалю выступлят на ґальовых (головных) концертах, а тіж являт серед локальных соспільности, як хоц-бы з выступами в опікунчо-вывохавчых осередках. Подібні як в попередніх роках, в рамках Фестівалю «Світ під Кычером» одбуде ся Лемківскій Кєрмеш в Заменицях (27. червця/юнія), при тамтышній грекокатолицкій парохіі св. Йоана Крестителя.