Сумар дня на 26. червця/юнія 2026 р.

Приносиме вам сумар медияльной ґрупы ЛЕМ.фм+ на ден 25. червця/юнія 2026 р.

«Бесіды в языку і о языку»

О тыжден, в пятницю 3. липця/юлия в Ґмінным Осередку Культуры в Устю Рускым одбуде ся стріча з назвом «Бесіды в языку і о языку», промуюча Контекстуальный Словник Лемківского Языка під ред. проф. Олены Дуць-Файфер. В стрічы возмут участ проф. Олена Дуць-Файфер, проф. Юстина Олько, проф. Павел Малецкій і члены словникового ансамблю. В рамках проґраму выступит тіж ансамбль Лада. Як заявила проф. Олена Дуць-Файфер, бесіда буде о словнику, але не лем, тіж шырше о нашым языку. Беручы участ в стрічы специялисты смотріти будут на язык з ріжных перспектив. Орґанізаторы просят ся присісти, послухати, влучыти ся до бесіды до своім голосом. Початок стрічы о 17.00 год.

Послідні опроваджяня по выставі «Штука/Лемків – Карпатскых Русинів»

Уж лем пару дни остало до кінця выставы пн. «Штука/Лемків – Карпатскых Русинів» в Державным Етноґрафічным Музею в Варшаві. На пращаня з выставом Музей прирыхтувал дакілько товаришучых подій. Вчера в просторах музею прошла дебата посвячена спадковині і сучасній присутности Лемків/Русинів в европейскій культурі, в котрій взяли участ представникы науковых, культурных і медияльных середовиск. Дальшом атрактицйом, яку прирыхтувал Музей, будут выступы Юлиі Дошны. Лемківскы пісні выполнят простір експозициі уж в тот, послідній вікенд выставы. Музичны выступы будут ся одбывати в ріжных моментах дня, медже 12.00 і 17.15. Заран пройде тіж выняткове опроваджаня, вчас котрого куратор і координаторка выставы оповідят о цілым процесі творіня выставы, єй фінальным виді і реакциях, якы выкликала она серед публикы. В неділю ДЕМ просит на лемківскє сніданя. В кулінарній працовни участникы будут спільно печы адзимкы, яшницю з копривом і додаткы інспіруваны смаками Карпат. В тот сам ден одбуде ся уж остатнє опроваджаня по выставі, котре поведе куратор выставы др Михал Шымко. Дрібниці найдете на сайті Державного Етноґрафічного Музею в Варшаві.

Практичны варштаты для жытелів Низкого Бескіду в Рускій Бурсі в Ґорлицях

Припоминаме, што уж заран, в суботу на год. 11:00, Стоваришыня «Руска Бурса» в Ґорлицях просит на практичны варштаты для жытелів Низкого Бескіду. Підчас варштатів вкажеме практичны розвязаня, котры помагают жытелям орєнтувати ся в процесах тыкаючых простору, середовиска і локальных інвестиций. Побесідуєме м.ін. о тым: де глядати інформаций о плянуваных інвестициях, як провірити пляністичны документы, якы інституциі одповідают за поєдны рішыня, як корыстати з доступу до публичной інформациі і інформациі о середовиску, коли і як брати участ в консультациях, якы можливости діяня мают жытелі, коли дашто родит іх вантпливости. Будеме працувати на конкретных примірах з ґмін Санкова і Устя Рускє. Варштаты поведе Анна Треіт – архітектка, специялистка дс. охороны природы в Загальнопольскым Товаристві Охороны Птахів. Просиме вшыкых, котрым залежыт на тым, як буде выглядала наша околиця і Низкій Бескід за 10, 20 і 30 років. Варштаты сут безплатны. Подія фінансувана з середків Нацийонального Інституту Свободы – Центру Розвитку Громадяньского Соспільства в рамках Урядового Проґраму Фундуш Громадяньскых Ініциятив NOWEFIO на рокы 2023-2030.