Уж заран загорит 36. Лемківска Ватра в Лугах

Уж заран, в Лугах в любушскым воєвідстві зачне ся 36. Лемківска Ватра. То єдна з найважнійшых стріч лемківской громады в Польщы, котра од років є нагодом до спільного веселіня, стрічы приятелів, плеканя традициі та презентуваня лемківской культуры.

Орґанізатором подіі є Стоваришыня «Лемко Тaвер» зо Стшелец Краєньскых. Як што рокa, в Лугах зыйдут ся Лемкы з ріжных реґіонів Польщы, в тым з рідной Лемковины.

Проґрам 36. Лемківской Ватры обнимат два дни (24. – 25. липця/юлия). Заран на сцені запрезенутют ся ансамблі: На драбині, Лемко Тавер Юньор, Троянда, Лемко Тавер і Лемкус. Наступного дня выступлят Ластівчата і Ластівочка (діючы при Кружку Стоваришыня Лемків в Пшемкові), ЛАПіТ Кычера, солистка Юлия Дошна, Бурнян, Серенча, Дуляровы Братя, Надія і Інтраде. Орґанізаторы передвиділи і конкурс. Вшытко тото вказує, што забракне з єдного боку традицийных лемківскых пісен, танців та фольклору, а з другого боку сучасных аранжаций.

Хоц подля проґраму офіцийне положыня огня буде аж в суботу, то такой Ватра загорит в серцях Ватрян вєдно з першым пятницьовым концертом. Подія потырват аж до неділі над раном. Завершыньом ватрового вікенду буде недільна служба в православній церкви Успіня Пресвятой Богородиці в Лугах, де парохом є о. митр. Артур Грабан.

Лугы то місце, якє сприят не лем культурным пережытям, але тіж одпочынкови. Участникы Ватры можут корыстати з озер та пляжы, котры находят ся недалеко ватрового поля. Завдякы тому стріча в Лугах є добром нагодом до получыня ватряного жытя з літнім одпочынком.