Потопа номінована на Оскара

О премію америцькой Академії філмовых умень і наук (AMPAS) в їй 99-ім річнику буде в катеґорії Найліпшый меджінародный філм змагати ся і першый ціловечерный по русиньскы граный філм Потопа. Як інформовала аґентура TASR, вырішыла о тім Словацька філмова і телевізна академія (SFTA), котра шторік выберать кандідата на Оскара за Словакію.

Членове SFTA выберали спомеджі пятьох граных філмів. Надполовічна векшына філмовой громады згодла ся на філмі Потопа, котрый здобыв найвеце оцінінь Slnko v sieti за 2025-ый рік, і належыть їй шість словацькый премій, котры уділює Словацька філмова і телевізна академія.

„Філм потопа є справды вынятковым ділом словацькой авдіовізуалной творчости. Нелем своїм умелецькым оформліньом, але і темов. Тота є, правда, локално закотвена, но єдночасно має выразный пересяг у цінностях, котрый філму дає універзалну дімензію. Тадь із примушеным выселіньом особ або комуніт люди стрічають ся почас цілой історії і на вшыткых теріторіях,“ повів Мартін Шматлак, віцепрезідент SFTA.

Зато має за словами Шматлака філм Потопа выразны шансы ословити меджінародну публіку. „То є важный аспект нашого выбраня. Віриме, же америцька Акдемія філмовых умень і наук позітівно оцінить креатівну якость того діла, і його тему, котра є у світі все актуална,“ додав.

99-ый річник удільованя Оскарів одбуде ся 14-го марца 2027-го року. Словацька републіка на Оскарах буде брати участь тридцятый раз.

SFTA іформовала, же філм, котрый несподівав многых фаховый, але і лаіцкых зрітелів, має од початку высокы оцініня. Публіку заінтересовали акторьскы выконаня многых професіоналных і непрофесіоналных акторів, котры грали у філмі, а так само філмовый язык режісера Мартіна Ґонды.

„Барз собі ціню, же Словацька філмова і телевізна академія выбрала за словацького кандідата на Оскара якраз Потопу. То про мене величезна честь. Тот філм є про мене вынятковым нелем зато, же є моїм ціловечерным дебутом, але і вдяка пути, котров выникав,“ коментовав номінацію Ґонда.

„Од першых рихтовань через натачаня аж по послідній день постпродукції намагали сьме ся приступати ку каждому детайлу із решпектом і почливостьов ку выселеній комуніті Русинів. Вірю, же якраз тота почливость оддзеркалила ся нелем у філмі, але і в односинах, котры почас його выробы ся вытворили, і в способі, якым сьме намагали ся приближыти судьбы ґенерацій той комуніты, і захопити тонкость їх счезаючого світа. Буду барз радый, покля їх історія і одказ ословлять і америцьку академію,“ додав Ґонда.