Карпатскій реґіон: етнолінґвістика і культуровы студиі. Рекрутация тырват!

Матуры і результаты матур уж давно за нами, а так само і першы туры рекрутациі. Дакотры може уж достали ся на вымрияны напрямы студий, а iнчы іщы задумуют ся, што робити зо свойом найблизшом будучністю і якым способом зъєднати заінтересуваня, ци може аж і свою достоменніст, зо студиюваньом чогоси, што реальні може вказати ся помічне в будучности, бесідуючы о карєрі, а так само о інчых аспектах жытя.

Ту з помічю приходиме мы, припоминаючы, же на Ягайлоньскым Університеті є уж отворена друга тура рекрутациі на напрям студий: Карпатскій реґіон: етнолінґвістика і культуровы студиі.

Карпатскій реґіон: етнолінґвістика і культуровы студиі. Чого мож ся навчыти?

Карпатскій реґіон то напрям студий для осіб зацікавленых языками, історийом, літературом, музиком і культуром держав карпатского реґіону. Студиi дают можніст познати культурову ріжнорідніст Карпат, історичны процесы, котры формуют тоту обшыр, а тіж спільны і окремы традициі в Польщы, Украіні, Словациі, Румуниі, Чехах і на Мадярах. В рамках проґраму студий мож ся вчыти словацкого і украіньского языків, а тіж записати ся на факультативный курс румуньского языка або єдиный того рода курс на університетскым рівни в Польщы – лекторат лемківского языка. Занятя ведут науковці з ріжных катедр і інститутів Ягайлоньского Університету, м.ін. з філолоґічных, етнолоґічных і реліґійознавчых, што надає тым студиям інтердисциплінарный характер.

Обовязковым елементом студий, котрый значучо підносит компетенциі студентів, сут тереновы досліджыня в карпатскых реґіонах Польщы і поза єй границями. Тот напрям веденый єст спільні Інститутом Східньославяньской Філолоґіі та Інститутом Славяньской Філолоґіі, Інститутом Реліґійознавства і Інститутом Етнолоґіі і Культуровой Антрополоґіі.

Лекторат лемкiвского языка? Для кого?

Занятя сут для вшыткых – незалежні од того, ци мали даколи контакт з лемківскым языком або кірилицьом – вшыткого ся навчат. Курс єст скєруваный до студентів, докторантів і науковых працівників Ягайлоньского Університету. Не становит то єднак перешкоды, жебы в лекциях брали участ інчы особы – i тоты, котры не мают ниякого звязку з університетом. Сутю курсу не є выключні познаня языка, а познаня лемківской культуры і єй особливости як раз через язык.

То уж наступный академіцкій рік, в котрым можна записати ся на курс лемківского языка. Занятя будут як все ведены проф. Оленом Дуць-Файфер, котра в своій науковій роботі посвячат вельо увагы власні основам наукы лемківского языка, i будут проходити в каждый віторок і четвер пополудни чеерз два семестры, з можливістю продолжыня наукы. Од минулого академіцкого рока занятя веде тіж Клавдия Новак.

Што дальше?

Карпатскій реґіон то ліценциятскы студиi, якы студенты завершают зо званьом ліценцията. Абсольвенты того напряму можут працувати в інституциях культуры і освіты, як нп. в музеях ци домах культуры. Цікавом опцийом може быти робота в медияльным секторі – в редакциях часописів, в радию ци телевізиі, як тіж в выдавництвах. Мож подумати о роботі в туристичній обшыри і многых інчых – адже, коли чловек кiнчыт тоты студиi знат найменше три чужы языкы і мат знаня в многых обшырях гуманістикы.

Де глядати інформаций?

Жебы мочы приступити до рекрутациі, треба зареґіструвати ся в системі IRK UJ. Речена друга тура тырват од 17. липця/юлия до 13. вересня/септембра. При кваліфікациі до увагы браны сут результаты матур з предметів такых як нп. анґлицкій язык, ґеоґрафія, істория, польскій язык ци інчы чужы языкы.

Інформациі на тему Карпатского реґіону мож найти на стороні Інституту Східньославяньской Філолоґіі Ягайлоньского Університету і безпосередньо на стороні напряму в IRK UJ.

Фото: pexels
Фiльм: Ягайлоньскій Університет, фiльм приготовленый на основi тереновых дослiджынь