Сумар дня на 17. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 17. серпня/авґуста 2026 р.

Пожар в скансені в Саноку – згоріл забытковый костел з ХVII ст. 

В ночы з суботу на неділю на обшыри скансену – Музею Народного Будівництва в Саноку дошло до пожару. На жаль, цілком згоріл забытковый костел з ХVII ст. з місцевости Бончаль Нижній, близко Біча. В святыни находили ся забытковы орґаны – іщы старшы як сам костел. Деревяный костел св. Миколая был перенесеный до скансену в 70 роках ХХ ст. Был єдным з найстаршых на Підкарпатю. Пожарникы отримали зголошыня о пожарі коло 1.00 в ночы. По тым, як службы нашли ся на місци, пожаром был уж обнятый цілый будинок деревяного костела, загороженых было іщы 10 поблизкых будинків. На місци працувало 140 пожарників з 27 одділів, єден был раненый. Костел цілком згоріл, не повело ся ани вратувати находячого ся в ним выпосажыня. Оген дальше перешол на сусідні забудуваня сектора східніх Погірян і занял іщы два обєкты – ХІХ-вічну хыжу і стодолу з місцевости Нєбоцко. Решту будинків повело ся вратувати. То другій пожар в істориі скансену. Першый был в 1994 р. і згоріло товды 13 обєктів. Актуальні в скансені в Саноку находит ся близко 180 обєктів деревяной архітектуры, в тым лемківскы. В звязку з пожаром скансен буде закрытый до одкликаня.

Торжества на Святій Горі Ґрабарці. На свято ідут і нижньошлезскы копальникы

В найблизшых днях православны вірны з цілой Польщы зыйдут ся на Святій Горі Ґрабарці, найбарже знаным православным поломницкым місци в Польщы, де пройдут головны святкуваня Преображыня Господнього. Што рока в торжестві берут участ тисячы вірных з Польщы і заграниці. Присутны сут тіж вшыткы єрархы Польской Автокефальной Православной Церкви. На свято традицийно ідут поломникы з ріжных стран Польщы. В минулым році першый раз на Ґрабарку пришли тіж копальникы з нижньошлезского воєвідства в парадных облечынях. Поломництво нижньошлезскых копальників путує на св. Гору Ґрабарку і того рока. Днес поломникы выіхали спід православной церкви Святой Тройці в Любіні. Заран, в передден свята поломникы перейдут піше з Сємятич в підляшскым воєвідстві на св. Гору Ґрабарку, де возмут участ в святочных богослужынях. Поломництво своім патронатом обняла компанія KGHM. Трансмісию з головной Літургіі мож обзерати в найблизшу середу 19. серпня/авґуста на каналі TVP 1 од год. 9.55.

Природничый мікрофестіваль – Барвы Низкого Бескіду

Кіцьом того тыжня в Низкым Бескіді пройде выняткова подія для любителів бескідской природы. Фундация Природнича Дідовизна і Стоваришыня Фіцедуля просят на природничый мікрофестіваль – Барвы Низкого Бескіду. Подія буде проходила в днях од 21. до 23. серпня/авґуста. Будут прелекциі, тереновы варштаты і вечерове пленерове природниче кіно. Подія зачне ся в найблизшу пятницю выкладом в Ґорлицях. В суботу і неділю перенесе ся в місце, де кінчыт са цивілизация, а зачынат спокій гір і лісів. На обшыри Низкого Бескіду в ґорлицкым повіті одбуде ся теренова част подіі – гляданя по слідах дикых звірят. Выклады, креативны варштаты і проєкциі фільмів будут на терені колибы в Бортным. На поєдны подіі обовязуют записы. Чысло місц ограничене.