Сумар дня на 1. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 1. жолтня/октобра 2026 р.

Порядкы на цмонтери в Радоцині

Стоваришыня Долины в найблизшый вікенд просит до участи в порядковых варшытатах на радоциньскій цмонтір. В рамках того будут ропуваны жырди – свіжо поставленого огороджыня. Стоваришыня даст материялы і почастунок. Варштаты будут проходити в суботу і неділю медже 10.00 а 15.00 год. Радоцина то днес неістнуюче лемківскє село, якє было остаточно выселене в 1947 р. в рамках акциі «Вісла».

Малыма кроками ближат ся ґожівскы Стрічы з Лемківском Культуром

Стоваришыня Лемків просит на наступну осінню подію. Тым разом ґожівскій Кружок СЛ просит 25. жолтня/октобра на ХХХІІ Стрічы з Лемківском Культуром в Ґожові Великопольскым. Стріча зачне ся о 16.00 год. в Театрі ім. Юлиюша Остервы, до котрого подія вертат по парурічній переві, колиси одбывала ся літньом пором в центрі міста. В рамках подіі выступлят Лемко Тавер Юньор, Карпатія, Дамир та Ансамбль Народного Танця «Малы Ґожовякы». Вступне на подію то 40 зл (мож придбати в касі театру).

Конференция в Гуменным – о выкорыстаню природных материялів в будівництві

7. жолтня/октобра в Гуменным одбуде ся медженародна конференция під назвом «Выкорыстаня природных материялів в народным будівництві нашых предків». Подія зорґанізувана єст в рамках проєкту «Деревяне серце Карпат – спадковина і будучніст», фінансуваного Европскым Союзом в рамках проґраму Interreg Польща–Словация 2021–2027. Конференция буде нагодом стрітити експертів і практиків з Польщы, Словациі та Украіны, котры занимают ся традицийным будівництвом, деревяном архітектуром, природныма материялами і охороном культурной спадковины. В проґрамі передвиджено 12 доповіди, котры будут представлены в двох тематичных блоках. Учасникы будут бесідувати, м.ін., о выкорыстаню природных материялів в традицийным будівництві, деревяній і сакральній архітектурі, охороні культурной спадковины. Представлены будут досвідчыня Музею Народного Будівництва в Саноку, скансену в Ужгороді, Експозициі Народной Архітектуры і Мешкальництва в Гуменным, а так само Музею Народной Архітектуры під Любовляньскым Замком. 8. жолтня/октобра заплянуваный єст тереновый выізд. Зголошыня до участи в конференциі сут до 2. жолтня/октобра.

«RUSYNSKE – Ден з Русинами в музею».

Днес, 1. жолтня/октобра в Східньословацкым Музею в Кошыцях одбыват ся третій річник подіі «RUSYNSKE – Ден з Русинами в музею». В проґрамі найдеме жыву приповідку, літературны ілюстрациі, выставы, творчы майстерні про діти, ремесла, русиньску кухню та презентацию традицийных продуктів. О 15:00 год. днес грекокатолицка літургія в деревяній церкви з Кожуховців. Пак фольклорный проґрам пн. «Русины спід Маковиці». В подіі участ возме писателька Людмила Шандальова в LEA TALKS RUSYN / LIVE PODCAST, а на завершыня – «Вечер русиньскых голосів», де прозвучыт народна, духовна і сучасна русиньска музика. Подія є нагодом познати русиньску культуру в єй традицийній, але і сучасній формі та стрітити ся з людми, котры єй днес творят.