Староста Баєровець бісідовав у Бруселі о стратеґії Право зістати

Ініціатіва малых сел (ІМС) їднала в Бруселі о рихтованій европскій стратеґії під назвов Право зістати, котра має реаґовати на вылюдньованя сел і одход молодых людей із меншых сел. Інформовала о тім аґентура TASR.

На стрічі із представителями Европского комітету реґіонів реперезентовав малы самосправы на Словакії староста русиньского села Баєрівці, Сабіновского окресу, Михал Секерак – основатель і підпредседа ІМС, член Округлого стола Русинів Словакії.

Як Секерак інформовав аґентуру, делеґація представила проєкт Міністерства інвестіцій, реґіоналного розвитку і інформатізації Словацькой републікы під назвов Ожывме малы села.

Стратеґію Право зістати представила Европска унія в місяці май 2026-го року. До кінця року має Европска комісія пририхтовати їй фіналну верзію і выділити европскы грошы на їй реалізацію. Цільом є створити условія, жебы люди, головно молоды, не мусили із причіны роботы а якостного жывота одыйти із сельскых реґіонів.

Стратеґія реаґує на демоґрафічны зміны в Европскій унії. Подля проґноз має до 2050-го року чісло жытелів сельскых реґіонів знижыти ся о майже вісем процент.

„Просто повіджено, Европска унія буде фінанчно підтримовати проєкты, котры будуть значіти то, же молоды люди будуть годны зістати дома. Жебы могли основати собі жывность, фірмы, будовати домы, вертати до родных сел. Так, жебы ся тот жывот про них став і в меншых селах, забытых долинах, добрым жывотом,“ повів Секерак.

Як далше повів староста Баєровець, европскы партнеры презентованый проєкт Ожывме малы села прияли позітівно. Єдночасно підкреслив, же підпора села бы не мала быти лем соціалным кроком, але і інштрументом на ожывліня реґіоналной економікы. Покля люди лишать ся або вернуть до своїх реґіонів і будуть в них робити бізніс, часть заробленых фінанцій подля нього зістане в тім реґіоні.

Секерак довогодобо зверать увагу на зле фінанцованя самосправ на Словакії, котре є подля нього теперь наставлене так, же проглублює реґіоналны розділы. Приклад бы собі подля старосты Бєровець могла брати Словакія із Чеськой репіблікы, Австрії або Данії.

Ініціатіва малых сел є крітічна і ку рихтованым змінам в области злучованя самосправ на Словакії. Секерак звернув увагу, же малы села, а до великой міры суть такы і русиньскы села на Словакії, бы мали быти до рихтовань реформы прямо залучены.