Сумар дня на 18. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 18. серпня/авґуста 2026 р.

Новы максимальны ціны палива

Вчера, 17. серпня/авґуста, вошли в жытя новы максимальны ціны палива на стациях. Днеска, 18. серпня/авґуста, ціны будут на такым самым рівни – максимальні 6,41 зл за літр бензины 95, 7,20 зл за літр бензины 98 та 7,37 за літр Diesla. Зменшыня цін є ефектом введіня урядом новых записів, што реґулюют ціны палива. Єдночаснi до кінця серпня/авґуста обовязує обнижена ставка VAT на бензину і Diesel – з 23 до 8 процентів. Введены розвязаня мают ограничыти влияня высокых цін палива на шоферів і обнижыти кошты транспорту. Новы переписы окрисляют максимальный рівен цін на стациях, а продаваня палива понад усталены ставкы може вязати ся з каром аж і до 1 млн зл.

Рапорт санепiду за 2025 рiк. Як то вызерат в ґорлицкым повітi?

Санепід опубликувал рапорт о санітарным стані Малопольщы за 2025 рік. Даны вказуют збільшыня дакотрых заразливы хворіт – особливо бореліозы і RSV. В Малопольщы чысло припадків бореліозы звекшыло ся з 4527 в 2024 році до 7713 в 2025 році, а припадкiв RSV з 4537 до 9639. Єдночасно значучо зменшыло ся чысло хворых на коклюш, скарлятину і вітряну оспу. B рапорті нашли ся тіж даны тыкаючы ґорлицкого повіту. В 2025 році стверджено гын пят професийных хворіт – в тым два припадкы бореліозы. Вартат при тым памятати, же уж тепер, в 2026 р., вказуют ся відомости о высокым чыслi захворувань звязаных з вкушыньом кліщів, особливі бореліозом. В звязку з тым заохочаме до звертаня увагы на своє самопочутя і можливы симптомы по контакті з кліщом та до робліня одповідніх бадань.

57. Медженародный Фестіваль Фольклору Гірскых Земель

В тот вiкенд зачне ся 57. Медженародный Фестіваль Фольклору Гірскых Земель, котрый одбуде ся в Закопаным. Під Татрами стрітят ся народны ансамблі з Польщы, Словациі, Хорвациі, Румуніі, Мадяр і многых інчых держав, презентуючы традицийну музику, танец, спів, кроі і культуру своіх реґіонів. В проґрамі фестівалю нашли ся м.ін. конкурсовы концерты, Народны Дни поєдных держав, пленеровы концерты, перехід улицями Закопаного, науковый семінар, реґіональны варштаты і занятя для діти. Єдном з подій буде тіж концерт «Музика Луком Карпат», ци концерт Штефана Штеця i Файты. Фестівальови товаришыти будут выставы фотографіі, кєрмеш народной штукы і ремесла та отворены варштаты закопяньскых артистів.

Музика Заклята в Деревi

В днях 26.–30. серпня/авґуста в забытковых деревяных обєктах Низкого і Сандецкого Бескідів одбуде ся фестіваль «Музика Заклята в Деревi». Концерты будут орґанізуваны м.ін. в церквах в Квятони і Верхомли Великій, в Мазярскій Загороді в Лоси, при костелі в Санковій та в амфітеатрі в Высовій. В проґрамі подіі нашли ся артисты, якы репрезентуют ріжны музичны ґатункы – од музикы інспіруваной традицийом Карпат і фольклором по сучасну альтернативну музику і поп. Фестіваль отворит Вернигора, а підчас дальшых дни выступлят м.ін. Войтек Шуманьскiй, Туля і VOŁOSI. Подіі товаришыти будут тіж варштаты ремесла, презентациі реґіональных страв, деґустациі локальных продуктів і зiля. Кажда з подій має быти нагодом познати выняткове дідитцтво Шляку Деревяной Архітектуры в Малопольщы. Вшыткы концерты сут безплатны.

Фот.: Festiwale Zakopane