50 робіт Епіфана Дровняка на єднiй выставі. Експозиция во вроцлавскым музею

Выстава «Никыфор – феномен саморідного талaнту» в Архієпархіяльным Музею во Вроцлаві вказує в стислый спосіб ґеніяльного, артистичного самоука. Вшыткы роботы походят з приватных колекций.

В підземлях музею мож обзерати презентацию, котра складат ся з 50 робіт Епіфана Дровняка, а тіж 20 фотоґрафій, на котрых го спортретувано в ріжных етапах жытя. Експозицию помістили в трьох салях і поділили на три части. В каждій з них роботы Никыфора помістили в загущыню, на стіні збудуваній з неотесаных дощок.

Перша саля – «Такій єм был», презентує 20 документальных фотоґрафій з колекциі Павла Карлика та прошальный лист Епіфана Дровняка, єден з вельох, котры писал до люди, жебы купували його образы. Дурга част – «Такій хотіл єм быти», зберат роботы, на котрых Никыфор представлят самого себе як важну і шанувану особу – урядника, єпископа. To доказ його мрий о добрым, сполненым жытю в соспільстві, котре в реальным жытю не было му так прихыльне. Послідня, третя саля – «Такій был мій світ», вказує світ, котрый видиме очами Никыфора. Презентуваны образы представляют архітектуру, церкви, міста, краєвиды і сцены зо штоденного жытя. Реальніст мішат ся з фантазийом.

«Выстава презентувана в суровых інтерєрах Архієпархіяльного Музею спілграт з історийом о жытю артисты, котрый векшыну свого жытя пережывал одшмаріня, незрозумліня і самітніст» – оцінят Барбара Демут, кураторка выставы. «З днешнього пункут пізріня был як чорна уця – не лем зато, што был нешлюбном дітином бідной матери, до того Лемком, але іщы мал проблем зо слухом і бесідом. Для мене найцікавша робота то Никыфор в дорозі, на котрій спортретувал сам себе, як іде покрученом дорогом» – продолжат кураторка.

Роботы Епіфана Дровняка выставляли в Парижы уж в довоєнным періоді, але узнаня пришло аж в 50. роках ХХ ст. Його штуку цінило вельох артистів тамтого часу, м.ін. Ян Цибіс, Альфонс Карный ци сучасный маляр – Едвард Двурнік. В 1967 році в варшавскій славній ґалериі Захента прошла індивідуальна выстава Никыфора.

Вшыткы презентуваны на вроцлавскій выставі роботы Епіфана Дровняка походят з приватной колекциі Роберта Довгана.

Вернісаж выставы прошол 24. червця/юнія тр., а обзерати мож єй іщы до 15. листопада/новембра.

Фот. Пресовы материялы Архієпархіяльного Музею во Вроцлаві