В Петровцях одсвяткують 190 років парохії

В суботу 5-го септембра 2026-го року одбуде ся в Петровцях, в Хорватії, святкованя 190-ой річніці основаня ґрекокатолицькой парохії.

Як інформовала Крижевацька єпархія, архієрейску літурґію в містній Церькви Покровы Пресвятой Богородіці одслужыть креижевацькый єпарха кір Мілан Стіпіч. Участны будуть і владыка Ґеорґій Джуджар – правлячій єпіскоп Єпархії святого Николая в Руськім Керестурі, а римокатолицькый архієпіскоп митрополіта дяковацько-осієцькый Дюро Хранич, якый буде мати на торжестві і проповідь.

Празднованя річніці основаня парохії в Петровцях збогатить і Хор ґрекокатолицькой Базилікы Сошествія святого Духа із Михаловець, на Словакії.

Парохія в Петровцях была основана 5-го септембра 1836-го року в присутности ґрофа Емеріка Елца, представителя Сримской жупы і Крижевацькой єпархії, котры підписали декрет. Русины до того села пришли о пять років скоріше.

Парохія выникла одділіньом ся од 35 кілометрів оддаленой парохії Преображенія Господа в Шіді, котрый днесь находить у войводиньскім Сримі. Наперед была парохія присвячена св. Йоанови, апостолови і євангелістови. У 1893-ім році была збудована нова церьков, а на основі того змінила назву і парохія, котра днесь є присвячена Покровы Пресвятой Богородіці.

Велика перебудова храму проходила в 1930-ім році, коли церьков дістала днешню подобу. Церьков має чотыри дзовны, котры подаровали русиньскы еміґранты із Петровець, якы жыли в америцькім Піттсбурзі.

Петровці суть єднов із найстаршых парохій Крижевацькой єпархії. На торжестві мають брати участь і представителі містной а реґіоналной самосправы, хорватьского парламенту, інштітуцій і орґанізацій.