Сумар дня на 3. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 3. вересня/септембра 2026 р.

О нас самых в Пшемкові

Заран о 17.00 год. в Пшемківскым Осередку Культуры і Бібліотеці одбуде ся наступна стріча з циклю «Łemkowie – opowieść w skrawkach», посвяченого істориі, культурі і языкови Лемків. Подія є подiлена на пару блоків. Першый з них буде посвяченый Лемкам вчера і днеска, то єст буде о тым, кым сут Лемкы – в рiжных контекстах. Пак участникы будут мочы взяти участ в лекциі лемківского языка, підчас котрой познают м.ін. основны слова, звороты а так само азбуку. Стрічу закінчыт част о лемківскій музиці, співі і танци, яка даст участникам шансу не лем послухати, але тіж активні влучыти ся в познаваня традициі. Стрічу поведут Оксана Грабан-Ліхтаньска і Данько Горощак. На подію прошены сут тоты, котры уж знают лемкiвску культуру, а так само тоты, котры хотят ю познати. Вступ дармо.

Владыка Йона Максим посвятил по ремонті церков в селі Варіхівці

В минулу неділю, 30. серпня/авґуста Высокопреосвященный владыка Йона Максим, пряшівскій архієпископ і митрополита вєдно зо священниками посвятил новый престіл, жертвенник, іконостас і одновленый інтерєр грекокатолицкого храму Успіня Пресвятой Богородиці в селі Варіхівці, котре є дочырньом парохіі Репеів, стропківского окресу. Інформувал о тым Інформацийный Центр Пряшівской Архієпархіі. Владыку привитал в селі староста Матуш Кузма і адміністратор парохіі отец Шымон Ґаян. По торжественній літургіі вірчы вєдно зо священниками і владыком Йоном пережыли приємне пополюдне при обіді, котре свойом творчістю сприємнил музикант Мирослав Гриб, якій є родаком з того села. Храм в Варіхівцях є з 1924 р. і є Народном Культурнов Памятком.

Неодолга тогорічна Лемківска Творча Осін

В днях 19.-20. вересня/септембра проходила буде ХХХIV Лемківска Творча Осін. Подія того рока буде в Бортным (першый ден) і в Ґорлицях в Рускій Бурсі (другій ден). Тогорічна едиция посвячена буде памяти Федора Кузяка (1926-2010), в 100. річницю його народжыня. Прото тіж першый ден одбуде ся в Бортным – рідным селі маляря, байкаря і соспільного діяча. Детальный проґрам буде оприлюдненый неодолга – товды го Вам принесеме. Орґанізатором подіі є Стоваришыня Лемків.

Уж заран одкрытя Музю Варголя в Меджелабірцях

А уж в заран одбуде ся торжественне одкрытя Музею Модерной Штукы Енді Варголя в Меджелабірцях. Припомнийме, што тот єден з двох музеів Варголя на світі і єдиный в Европі был од марця 2023 р. запертый – переходил в тым часі велику реконструкцию. По перебудові в музею нашли ся новы експозицийно-едукацийны просторы, амфітеатр ци зелены елементы, такы як зелена стріха. Модернізуваны были так само технолоґіі, в тым систем безпекы. Подія одкрытя проходила буде заран в год. од 9.00 до 16.00, при участи Дональда Варголы, сыновця Енді Варгола, якій є амбасадором святочного одкрытя. В рамках музичной части запрезентуют ся: Катаріна Кошчова, Домініка Новотна і AMC Trio та Комайота. Будут і додатковы атракциі, такы як варштаты сітодруку. В годинах тырваня подіі будут тіж індивідуальны прогулькы по музею. Веце о одкрытю музею прочытате в дописі на нашым портали. Цінник вступного найдете на фейсбуковым сайті Музею.