Сумар дня на 8. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 8. вересня/септембра 2026 р.

Kaufland по шлезскы

Ярю того рока на обшыри шлезского воєвідства в сіти склепів Kaufland явили ся польско-шлезскы означыня. Першый склеп з такыма написами был отвореный в Катовицях, а днес написы по шлезскы мож видіти уж м.ін. в Катовицях, Хожові, Ґлівицах, Забжы, Бытомі ци Рыбнику. Разом в 22 склепах. Означыня односят ся так до назв поєдных катеґорий продуктів, як і до інчых елементів склепового простору. Тепер Стоваришыня Осіб Шлезской Нацийональности «Ślonzoki» хоче, жебы подiбне розвязаня явило ся тіж в склепах на Опольщыні. Як ся вказує, присутніст шлезского має великє значыня не лем в часі свят ци культурных подій, але так само в місцях, до котрых жытелi ходят по обычайны закупы. Сама процедура введіня двоязычных означынь не єст, як ся вказує, скомплікувана. В припадку шлезского была то справа порозумліня заряду склепу з орґанізацийом репрезентуючом шлезску спільноту. Надієме ся, подiбна спілпраця в будучности отворит дорогу тіж для присутности лемківского языка в торговым просторi.

«По свойому» – IV Фестіваль Гвар Погранича

10. і 11. вересня/септембра в Гайнівці одбуде ся IV Фестіваль Гвар Погранича «По свойому». Тогорічна едиция буде посвячена языковій ріжнорідности Польщы і жывій бесіді погранича. 10. вересня/септембра о 17.00 год. в Містній Публичній Бібліотеці в Гайнівці одбуде ся промоция книжкы «Языкова ріжнорідніст в Польщы. Спільноты, што хоснуют колятеральны языкы, і іх етнолінґвістична жывотніст», під редакцийом Нiколь Доловы і Мацєя Ментрака. Підчас стрічы одбуде ся тіж дискусия посвячена м.ін. языковій ситуациі на Підляшы. В тым році фестіваль буде мал тіж медженародный вымір. До Гайнівкы придут выкладовці і дослідникы з Унiверситету в Кембрiдж, заінтересуваны місцевыма гварами, веденыма на Підляшы досліджынями і діянями для захованя жывой бесiды погранича. 11. вересня/септембра в Парку одбудут ся дві подіі. На 18.00 год. заплянувано «Вечоуркы по свойому» – стрічу з істориями, споминами і оповістями мешканців, переказуваныма в місцевій бесiдi. О 19.00 год. фестіваль закінчыт концерт ансамблю Черемшына.

«Кривулька і спів – сплетіня лемківской традициі» – фiнал

13. вересня/септембра о 17.00 год. в світлици в Новици одбуде ся фінальный концерт проєкту «Кривулька і спів – сплетіня лемківской традициі». Выступлят участникы проєкту, одбуде ся тіж показ прац зробленых підчас варштатів. Проєкт обнимал занятя посвячены традицийному лемківскому співови та заплітаню пацюрків. Фінал буде послiдньом спільном стрічом участників проєкту. Подія одбуде ся в світлици в будинку Новиця 31.

Уж скоро ХХХIV Лемкiвска Творча Осiн

В днях 19.-20. вересня/септембра проходила буде ХХХIV Лемкiвска Творча Осiн. Тогорічна едиция посвячена буде памяти Федора Кузяка, в 100. річницю його народжыня. Першый ден подii одбуде ся в Бортным – рідным селі маляря, байкаря і соспільного діяча. В другiй ден стрiтиме ся в Ґорлицях в Рускій Бурсі. Детальный проґрам буде оприлюдненый неодолга. Орґанізатором подіі є Стоваришыня Лемків.

4. Лемківскє Співаня на Нижнiм Шлезку

19. вересня/септембра в місцевости Высокє в нижньошлезсым воєвідствi одбуде ся 4. Лемківскє Співаня. Орґанізаторы просят вшыткых, котры хотят послухати лемківской музикы, але тіж тых, котры хотят спільно поспівати. Пiдчас стрiчы одбудут ся выступы народных ансамблів і співаків.