Сумар дня на 9. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 8. вересня/септембра 2026 р.

Черговый атак на грекокатолицку парохію в Ліґници

Тым разом незнаный справця підпалил оздобне кряча – туі, котры росли вздолж огороджыня церкви покровы Успінія Пресвятой Богородиці. Спалили ся рослины і част огороджыня, щестьом, оген не розышол ся дале, на будинок храму. Як поінформувала парохія, до того небезпечного інциденту дошло 5. вересня/септембра. Дале не знатя, хто підпалил рослины. Душпастырство апелює о поміч і контакт каждого, хто дашто виділ або дашто знає в справі підпаліня. То не єдиный акт вандализму – на пристанку, што находит ся при цекрви, появил ся тіж вульґарный напис тыкаючый Украіны і Украінців. Припомнийме, што то уж черговый інцидент направленый проти ліґницкой грекокатолицкой спільноты. Минулого рока вркали і знищыли крест з головной бані церкви. Злодійом креста был 30-літній мужчына. Ліґницкій Районовый Суд в першій інстанциі засудил го на три рокы вязниці. Шкоды, якы повстали в наслідстві його діянь, оцінено на кількасот тисячів злотыx, а само переступство выкликало великє обуріня серед вірных. Акты вандализму і ненависты не можут быти толеруваны незалежно од нацийональности ци віроісповіданя. Справом підпаліня занимают ся одповідні службы.

Торжества в памят священномученика Максима Ґорлицкого. Вручено Медалі в 100. річницю повороту Лемків до православія

В минулый вікенд 5. і 6. вересня/септембра в катедральній церкви св. Тройці в Ґорлицях прошли торжества в памят священномученика Максима Ґорлицкого, лемківского святого. Божественну літургію в неділю 6. вересня/септембра очолювал Высокопреосвященый Авель, архієпископ Люблиньскій і Холмскій, вєдно з ним служыли: Высокопреосвященый Ґеоґрій, архієпископ Вроцлавскій і Щеціньскій, Высокопреосвященый Паісий, архієпископ Перемышльскій і Ґорлицкій, Высокопреосвященый Яков, архієпископ Білостоцкій і Ґданьскій та Преосвященый Афанасий, єпископ Лодзіньскій і Познаньскій. Присутны были духовны перемышльско-ґорлицкой єпархіі та священникы дальшых єпархій і чысленно згромаджены вірны – в тым поломникы з західніх земель і з Підляша. Ґорлицкы торжества были частю центральных святкувань 100. річниці конверсий Лемків на православія. З той нагоды тіж установлено памяткову нагороду – Медаль в 100. річницю повороту Лемків до православія. Высокопреосвященый Паісий вручыл штырі нагороды – вшыткым присутным єрархам. Медаль з означыньом першым признано Блаженнійшому Саві, митрополиті Варшавскому і цілой Польщы. Дальшы тожества пройдут 19. вересня/септмбера в Тыляві.

Записы на Лемковина Ультра Трейль

Любителі гірскых змагань мают причыну, жебы підняти скоре рішыня. Орґанізаторы Лемковина Трейль припоминают, же лем до кінця дня обовязуют низшы стартовы оплаты на тогорічну едицию єдной з найвекшых трайльовых імпрез в Польщы. Лемковина Трейль одбуде ся в днях од 16. до 18. жолтня/октобра путями Низкого Бескіду. Спортовці можут стартувати на парох дистансах: од 10 до аж і 150 км. Трасы ведут м.ін. Головным Бескідскым Шляком через вынятковой красы обшыри Лемковины. Орґанізаторы заохочуют вписувати ся уж тепер і не чекати на послідній момент. Лемковина Трейль од років притігат тисячы участників з цілой Польщы і заграниці. В середовиску бігачів принимат ся єй за єдну з найважнійшых подій ультра в Польщы. Серед змагаючых все находит ся репрезентация Лемків – не інакше буде і того рока – беручы участ уж міцно тренуют, жебы выстартувати тіж на тых барже вымагаючых, долгых трасах.