Сумар дня на 11. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 11. вересня/септембра 2026 р.

На Ягайлоньскым Університеті творит ся Працовня Лемкознавчых Студий

4. вересня/септембра тр. Ректор Ягайлоньского Університету выдал заряджыня, што в орґанізацийній структурі Філолоґічного Выділу Ягайлоньского Інституту творит ся Працовню Лемкознавчых Студий. Задачом Працовні буде ведіня інтердисциплінарной дослідичной діяльности та звязаной з ньом дидактичной і популяризаторской діяльности, в обшыри шыроко пониманых студий над языком, літературом, культуром і лемківском/русиньском достоменністю. Заряджыня входит в жытя з дньом 1. жолтня/октобра тр. Припомийме, што од 2024 р. в Інституті Східньославяньской Філолоґіі ЯУ веденый єст єдиный в Польщы лекторат лемківского языка в рамках проґраму студий Карпатскiй реґіон: етнолінґвістика і культурны студиі. Ректутация на тот напрям, што скєруваный є для осіб, якы сут заiнтересуваны языками, історийом, літературом, музиком і культуром держав карпатского реґіону, тырват до 13. вересня/септембра.

На Варшавскым Університеті діє Працовня Досліджынь над Лемківском Культуром

Згідно з інформацийом, што опубликувана на сайті Варшавского Універсытету, діє там Працовня Досліджынь над Лемківском Культуром. Звязаны сут з ньом проф. ВУ др габ. Лідия Стефановска і др Михал Шымко. Досліджыня проф. Лідиі Стефановской зосереджают ся на шыроко пониманій лемківскій культурі ХХ і ХХІ ст., особливо літературній діяльности та штуках плястичных. Др Михал Шымко досліджат культуру і штуку Лемків, беручы до увагы особливо лемківску/русиньску історию штукы та проблематику культуровой памяти. Інтеґральным елементом його діяльности єст праца кураторска і популяризаторска, направлена на пошыріня знаня о штуці і культурі Лемків та забезпечыня ій належного місця в інституцийональным і публичным просторі. Приміром кураторской діяльности дра Михала Шымко є выстава «Формы присутности. Штука Лемків/Карпатскых Русинів», што была презентувана в Державным Етноґрафічным Музею в Варшаві.

Фестіваль Хорів в Креници

Заран, в суботу 12. вересня септембра в православній церкви св. Владиміра в Креници одбуде ся черговый Фестіваль Хорів. Церковный репертуар запрезенуют Хор Зоря, Хор Клірос, Хор Cantores Carvatiani, Хор Православной Парохіі в Морохові, Жіночый Аматорскій Хор з Устя Руского і домашній – Хор Православной Парохіі в Креници. Початок концерту о год. 13.30. Вступне на подію дармо.

Награня святочной Літургіі з Ґорлиц в TVP Культура

Як поінформувала Екуменічна Редакция польской державной телевізиі TVP, в найблизшу неділю 13. вересня/септембра о 8.00 год. в TVP Культура мож буде обзерати награня православной Літургіі з катедральной церкви в Ґорлицях. Торжества в чест св. Максима Ґорлицкого, підчас котрых проходили центральны святкуваня сотной річниці повороту Лемків до православія, одбыли ся в минулу неділю 6. вересня/септембра.

Шаховый турнір в Осередку Правосланой Культуры в Ґорлицях

Як інформує православна парохія Святой Тройці в Ґорлицях, заран, в суботу, 12. вересня/септембра, одбуде ся дальшый шаховый турнір, до участи в котрым прошены сут вшыткы охочы. Подія одбуде ся в рамках XХІ Екуменічной Спортовой Олимпіяды «Єдніст в спорті». Вшыткы змаганя будут проходити на обшыри Осередка Правосланой Культуры в Ґорлицях, якій містит ся при тамтышній церкви. Змаганя зачнут ся з самого рана, о 9.00 год. Одбудут ся в трьох віковых катеґориях – од наймолодшых (до 10 років), через середній вік (до 16 років) і народжены в 2009 р. або перше. Вступне дармо, а записы будут в ден початку змагань, од год. 8.30.