Сумар дня на 15. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 15. вересня/септембра 2026 р.

Псалтырь буде по русиньскы

Архієпископ митрополита пряшівскій Йона Максим выдал згоду на публикацию Псалтыря в русиньскым языку. Як інформувало Товариство св. Йоана Хрестителя, 27. серпня/авґуста 2026 р. архієрей уділил Імпріматур, значыт церковне дозволіня на друк русиньского перекладу псальмів. Плянуваны сут два выданя. Перше, пн. Книга псальмів, буде обнимало текст псальмів в церковнославяньскым і русиньскым языку. Другє – Співам Господу псальмы – буде публикацийом выключні русиньскоязычном, приготуваном тіж з думком о співаню псальмів підчас богослужынь і дома. Переклад хоронит властиву для східньой традициі нумерацию псальмів подля Септуаґінты і іх поділ на кафiзмы. Обі публикациі мают явити ся іщы в 2026 році. То дальшый крок в удоступняню реліґійных текстів в русиньскым языку. В 2025 р. схвалили русиньскє тлумачыня Літурґікону – Божественной літургію од Йоана Златоустого, а згоду на друк отримал тіж Новый Завіт в русиньскым языку.

Упамятніня жертв пацифікациі в Розділю

8. вересня/септембра в Розділю одбыли ся упамятніня посвячены жертвам німецкой пацифікациі села з 1939 рока. Было то перше офіцийне упамятніня тых дій, зорґанізуване 87 років по траґедиі. До пацифікациі дошло 8. вересня/септембра 1939 р., пару лем дни од початку войны. Німці выстріляли населіня села і спалити іх хыжы. Подля джерел вбили найменше шiст осіб. Німецкы воякы згромадили тіж векшу ґрупу мешканців, котрым горозила еґзекуция. До того остаточні не дошло, дякуючы інтервенциі Австрияка Кароля Ґросса, якiй жыл в селi. В рамках упамятнінь вказвны были памятковы таблиці посвячены жертвам пацифікациі. Была тіж літургія, котру служыл о. Григорий Пацан, парох місцевой грекокатолицкой парохіі.

«Карпаты закляты в дереві» в Саноку

В неділю 20. вересня/септембра в Музею Народного Будівництва в Саноку одбуде ся подія «Карпаты закляты в дереві». Акция буде тырвала од 15.00 до 20.00 год. в Етноґрафічным Парку. Подія уж од років лучыт музику, танец і фольклор карпатскых краів з традицийным ярмаком выробів ручной роботы. Єй головным геройом остає дерево – суровина, што віками формувала штоденне жытя, архітектуру і штуку жытелів реґіону. Тогорічна едиция одбыват ся пізнійше, як первістні плянувано. «Карпаты закляты в дереві» мали одбыти ся 23. серпня/авґуста, єднак подія была товды одкликана в звязку з пожаром забыткового костела, што находит ся на обшыри саноцкого скансену. На сцені выступлят многы ансамблi, якы грают музику iнспiрувану Карпатами. В проґрамі подii нашли ся м.iн. ярмак выробів ручной роботы, концерты, реґіональна кухня, показы і варштаты звязаны з деревом, а тiж атракциі для діти.

Ближучы культуральны подii

Найблизшый вікенд принесе пару подій повязаных з русиньском культуром. Припоминаме о краківскій експозициі «Енді Варголь. Од крискы до леґенды», на одвиджыня котрой остали уж лем нецiлы два тыжні. Выстава буде доступна до 27. вересня/септембра в Палаци Штукы при пляци Щепаньскым 4 в Кракові.

В днях 19.-20. вересня/септембра проходила буде 34. Лемківска Творча Осін, того рока посвячена 100. річници народжыня писателя і маляря Теодора Кузяка. Подii пройдут в Бортным i Ґорлицях. В проґрамі сут стрічы з творцями з Польщы і Словациі, а в артистичній части выступлят м.ін. ансамбль Терочка, Тiмотей Федор з Марiйом Марiлловом та Народна Капеля Роберта Гарчара.

Тіж 19. вересня/септембра в місцевости Высокє в ґміні Рудна одбуде ся четверта едиция Лемківского Співаня. Од год. 14.00 на участників чекают концерты, выробы ручной роботы і реґіональны стравы. Орґанізаторы просят вшыткых, котры хотят послухати лемківску музику, але тіж тых, котры хотят спільно поспівати.